
第一世噶玛巴教言集1KM5རྣམ་ཐར་རེའུ་མིག་བརྒྱ་རྩ་བརྒྱད་པ་བཞུགས་སོ། །
1-2-47b
༄༅། །རྣམ་ཐར་རེའུ་མིག་བརྒྱ་རྩ་བརྒྱད་པ་བཞུགས་སོ། །
༄༅། །རྣམ་ཐར་རེའུ་མིག་བརྒྱ་རྩ་བརྒྱད་པ་བཞུགས་སོ། །ཚོགས་གཉིས་རབ་རྫོགས་སྐུ་གསུམ་ལྷུན་གྱིས་གྲུབ། །སྣང་སྟོང་དབྱེར་མེད་ཆོས་སྐུའི་ངང་ལ་བཞུགས། །བདེ་ཆེན་སྤྲོས་བྲལ་འོད་གསལ་རྒྱུན་ཆད་མེད། །དུས་གསུམ་ཤེས་བྱ་རྡོ་རྗེའི་སྤྱན་གྱིས་གཟིགས། །སངས་རྒྱས་ཀུན་གྱི་ངོ་བོ་རྡོ་རྗེ་འཆང་། །སྟོང་པ་སྙིང་རྗེ་དབྱེར་མེད་ཆོས་ཀྱི་རྗེ། །སྤྲུལ་པ་དུ་མས་འགྲོ་དོན་རྫོགས་པར་མཛད། །མཉམ་མེད་རིན་པོ་ཆེ་ལ་གུས་ཕྱག་འཚལ། །བླ་མ་རིན་པོ་ཆེའི་རྣམ་པར་ཐར་པ་རེའུ་མིག་བརྒྱ་རྩ་བརྒྱད་ཀྱི་ནང་ནས་རྣམ་པར་ཐར་པ་བརྒྱ་རྩ་བརྒྱད་རི་མོར་བཞུགས་པ་ལ། དང་པོ་ཤར་ཕྱོགས་ཀྱི་འཇིག་རྟེན་གྱི་ཁམས་བཻ་ཌཱུརྱའི་ཞིང་ཁམས་སུ་སྐྱེས་ནས་དགེ་སློང་གཅིག་ཡིན་པ་དྲན་གསུང་། གཉིས་པ་ལྷོ་ཛམྦུ་གླིང་དང་། ནུབ་བ་ལངས་སྤྱོད་ཀྱི་བར་ན་གླིང་ཕྲན་དྷ་རི་ཐ་བྱ་བར་སྐུ་སྐྱེས་ཏེ། དེའི་དུས་ན་བླ་མ་ལྷ་རྗེ་རིན་པོ་ཆེ་རྣལ་འབྱོར་པ་སུ་ར་པ་ཞེས་བྱ་བ་ཡིན་པ་ལ། ངས་ཁོང་ལ་སེམས་བསྐྱེད་ཞུས་གསུང་། གསུམ་པ་དེའི་རྟིང་ལ་ཛམྦུའི་གླིང་འདིའི། རྒྱ་གར་ནུབ་ཕྱོགས་ཨུ་རྒྱན་དུ་སྐྱེས་ཏེ། རྣལ་འབྱོར་པ་ཨུ་ཏི་ཏ་བྱ་བ་སློབ་དཔོན་མེད་པའི་རང་བཞིན་
1-2-48a
༄༅། །གྱི་རྣལ་འབྱོར་པ་གདམས་ངག་མི་སྟོན་ཏེ་ནུས་པ་མཆོག་ཏུ་གྱུར་པ་ཞིག་ཡིན་གསུང་། བཞི་པ་དེའི་རྗེས་ལ་ནུབ་བ་ལང་སྤྱོད་ཀྱི་གླིང་དུ་བྲམ་ཟེའི་རིགས་སུ་སྐྱེས་གསུང་། རབ་ཏུ་བྱུང་ནས་མཚན་དྷརྨ་ཨ་ཏི་ཐ་ཞེས་བྱ། གསང་མཚན་དྷརྨ་ཤཱི་ཡིན། སེམས་ཅན་འགའ་ཞིག་ལ་ཕན་ཏེ། དེའི་དུས་ཀྱི་ངའི་བླ་མ་དེ་ཏེ་ལོ་པ་ཡིན་གསུང་། ལྔ་པ་དེའི་རྟིང་ལ་བ་ལང་སྤྱོད་ཀྱི་གླིང་དེ་ཉིད་དུ་གླང་པོ་ཆེར་སྐུ་སྐྱེ་བ་བཞེས་ནས། མུ་སྟེགས་ཀྱི་རྒྱལ་པོ་དྷརྨ་ཤཱི་ལ་བྱ་བ་སངས་རྒྱས་ཀྱི་བསྟན་པ་ལ་གནོད་པ་ཞིག་ཡིན་པས། གླང་པོ་ཆེ་བདུན་བརྒྱ་ཙམ་དང་དམག་ཁྱེར་གཅིག་ལ་སོང་བའི་དུས་སུ་དམག་ཁྱེར་གྱི་གོང་དེར་མུ་སྟེགས་ཀྱི་རྒྱལ་པོ་དེ་བརྫིས་ནས་བསད། དེའི་དགོངས་པ་ནི་སངས་རྒྱས་ཀྱི་བསྟན་པ་ལ་ཕན་པར་བྱ་བ་དང་། སྡིག་སྤྱོད་ཀྱི་རྒྱལ་པོ་དེ་ངན་སོང་ནས་འདོན་པའི་དོན་དུ་ཡིན། དེ་ནས་ངའི་གདུལ་བྱར་གྱུར་པ་ད་རེས་ཡོན་བདག་དགོན་པ་བ་ཡིན་གསུང་། དྲུག་པ་དེའི་རྗེས་ལ་རྒྱ་གར་ཀ་ལིང་ཀའི་རྒྱལ་ཁམས་སུ་སྐྱེས་ཏེ། རྒྱལ་པོ་ཟླ་བ་རྣམ་པར་གནོན་པ་ཞེས་བྱ་བ་ཡིན། དེའི་དུས་ན་ངའི་བླ་མ་ལྷ་རྗེ་འདི་སངས་རྒྱས་ཡེ་ཤེས་ཞབས་བྱ་བར་མཚན་ཐོགས་པ་གཅིག་ཡིན། དེའི་སློབ་དཔོན་འཇམ་དཔལ་བཤེས་གཉེན་ཨ་བ་དྷ་ཏི་པ་ཡིན། དེའི་དུས་ན་དཔལ་ལྡན་འབྲས་སྤུངས་ཀྱི་མཆོད་རྟེན་ལ་བསྐོར་བ་བྱེད་དུ་སོང་བའི་ཚེ། ནམ་
1-2-48b
མཁའ་ནས་སྒྲ་གྲགས་པས། ཁྱོད་ཀྱིས་ད་དུང་དངོས་གྲུབ་མི་ཐོབ་པར་འདུག །ཕར་ལ་སོང་ལ་འདུས་བྱས་ཀྱི་དགེ་བའི་རྩ་བ་གྱིས་ཟེར་བ་བྱུང་། དེ་ནས་དགེ་འདུན་གྱི་སྡེ་བཙུགས། འདུས་བྱས་ཀྱི་དགེ་བའི་རྩ་བ་མང་པོ་མཛད། དེ་ནས་ཕར་ལ་བཞུད་ནས་བསྐོར་བ་མང་པོ་མཛད་པས་ཐུན་མོང་གི་དངོས་གྲུབ་མ་ལུས་པ་ཐོབ་སྐད། དེའི་དུས་ཀྱི་འཇམ་དཔལ་བཤེས་གཉེན་ཨ་བ་དྷ་ཏི་པའི་སྤྲུལ་པ་ནི། བླ་མ་མིད་ལ་ཉིད་ཡིན༑ སངས་རྒྱས་ཡེ་ཤེས་ཞབས་ནི་བླ་མ་ལྷ་རྗེ་ཡིན་སྐད། འཕགས་སྐོར་གྱི་ལོ་རྒྱུས་དེ་དང་མི་མཐུན་གསུང་། བདུན་པ་དེའི་རྗེས་ལ་ཛམྦུའི་གླིང་འདིའི་བྱང་གི་མཐའ་ཟད་པའི་བྱང་ཤར་མཚམས་ན། ཆུ་ཀླུང་མེ་ཏོག་པད་མས་བརྒྱན་པ་བྱ་བ་ན་སྐྱེས་ནས་དགེ་སློང་དྷརྨ་ཀཱིརྟི་བྱ་བ་ཡིན། མཁན་པོ་ནི་བྲམ་ཟེ་སཛྫ་ན་བྱ་བ་ཡིན་ཏེ། ངས་ཀྱང་གཞན་གྱི་མཁན་པོ་བྱས། མཁན་པོ་ནི་དགེ་བཤེས་སྟག་དེའུ་བ་ལ་སོགས་པ་ཡིན་པས། ཚོགས་འདི་ན་ཡང་འགའ་ཙམ་ཡོད། དེའི་དུས་སུ་སློབ་དཔོན་ཌོམྦི་པ་ལ་རི་བྱ་སྐྱིབས་སུ་གསོལ་བ་ཐེབས་པ་ཡིན་གསུང་། བརྒྱད་པ་དེའི་རྟིང་ལ་ཤར་ཕྱོགས་ཀྱི་གླིང་ལུས་འཕགས་པོ་ན་རྒྱལ་པོ་དགེ་བ་བཟང་པོ་ཞེས་བྱ་བའི་བུ་མོར་སྐྱེས་ཏེ། མིང་ནི་ཤེས་རབ་བཟང་མོ་ཡིན་ཏེ། གསང་མཚན་མཚོ་སྐྱེས་བོ་དྷི་ཞེས་བྱ། རྒྱལ་བུར་སྐྱེས་ན་རྒྱལ་སྲིད་འཛིན་དགོས་པས་བུ་མོར་སྐྱེས་པའི་རྒྱུ་མཚན་དེ་ཡིན་སྐད། 
1-2-49a
༄༅། །དེའི་དུས་སུ་བླ་མ་ལྷ་རྗེ་དགེ་སློང་དྷརྨ་སིདྷི་ཞེས་བྱ་བ་སྟེ། ཁོང་ལ་སྡོམ་པ་བླངས་ནས་ཚུལ་བཞིན་དུ་བསྲུངས། ཡོ་བྱད་མང་པོ་ཡོད་པ་རྣམས་བླ་མ་ལྷ་རྗེ་ལ་ཕུལ་ནས་མཉེས་པར་བྱས་ནས་ཆོས་ཀྱང་ཅི་ཞུས་གནང་གསུང་། དགུ་པ་དེའི་རྗེས་ལ་ཤར་ལུས་འཕགས་པོ་དང་ལྷོ་ཛམྦུ་གླིང་འདིའི་བར་གྱི་ཤར་ལྷོ་མཚམས་ན། གླིང་གཡོག་ཡོངས་སུ་གྲགས་པ་ཀུན་ནི་མ་ཡིན། ར་དྷ་པ་ལ་ཞེས་བྱ་བའི་གླིང་ཕྲན་ཅིག་དུ། གྲོང་ཁྱེར་རཱ་ཛ་ཕ་ལ་ཡང་ཟེར། རྒྱལ་པོ་བཟང་པོའི་གྲོང་ཁྱེར་ཡང་ཟེར་བ་དེར་སྐྱེས། རིགས་རྗེའུ་རིགས་ཡིན། ཡབ་དྷརྨ་སྦས་པ་དང་། ཡུམ་སུ་མ་ཏི་གཉིས་ཀྱི་སྲས་སུ་མིང་པ་ཏི་ཀཱིརྟི་ཞེས་བྱ་བར་སྐྱེས༑ རབ་ཏུ་བྱུང་ནས་མཚན་དགེ་སློང་རཏྣ་ཤྲཱི་ལར་བཏགས། ལོ་བརྒྱ་དྲུག་བཅུ་རྩ་བཞི་ཐུབ། སྤྱོད་པ་ནུས་པ་གཅིག་ཡིན་སྐད། དེའི་དུས་ན་བླ་མ་ལྷ་རྗེ་འདི་དཔལ་གྱི་སྦས་པ་ཞེས་བྱ་བ་ངའི་བླ་མ་ཡིན། དེའི་ཚེ་ངའི་སློབ་མ་བཀའ་གདམས་པ་ལ་སོགས་པ་མང་པོ་ཡོད་ལ། ཆོས་དབང་གིས་རབ་ཏུ་འབྱེད་པ་ཞེས་བྱ་བ་བཤད། དེའི་དུས་དང་ད་ལྟ་ཕན་ཐོགས་པ་ཡིན་གསུང་། བཅུ་པ་དེའི་རྗེས་ལ་སྟོང་གསུམ་གྱི་ལྟེ་བ་འདིའི་ལྷོ་ཕྱོགས་ཀྱི་ཛམྦུའི་གླིང་གི་དབུས་རྡོ་རྗེའི་གདན་ནས་བྱང་ཕྱོགས་ཀྱི་རྒྱུད་ཁ་བ་ཅན་གྱི་རྒྱལ་ཁམས་ཀྱི་སའི་སྨད། ཡུལ་ཏྲེ་ཤོད་གངས་ཀྱི་ར་བར་སྤོ་ཆུ་ལྷ་ལྡོང་དཀར་པོ། ཡབ་བསྒོམ་པ་རྡོ་རྗེ་མགོན་པོ་
1-2-49b
དང་༑ ཡུམ་ལྷ་དོག་ཟ་མིང་འདྲེན་ཞེས་བྱ་བའི་སྲས་སུ་སྐྱེ་བ་བཞེས་ནས། མཚན་ཡང་དགེ་འཕེལ་བྱ་བར་བཏགས་སོ། །བཅུ་གཅིག་པ་ནི་བསྒོམ་པ་རྒད་པོ་དང་ཡབ་ལ་ལྷ་མོ་ཐུགས་ཀྱི་སྲོག་བསྒྲུབ་ཞུས་སོ། །བཅུ་གཉིས་པ་བླ་མ་བཻ་རོ་ཙ་ན་དང་དཔལ་འཛིན་དང་མཇལ་ནས་གདམས་ངག་མང་པོ་དང་། མགོན་པོ་བྲམ་ཟེ་མཆོག་སྲེད་ཀྱིས་མཛད་པ་ཞུས། བཅུ་གསུམ་པ་ལྷ་མོ་དེ་བསྒྲུབས་པས་གྲུབ་རྟགས་ཚང་བར་བྱུང་ནས་ལྷ་མོ་དེའི་ཞལ་གཟིགས་སོ། །བཅུ་བཞི་པ་ནི་འདུ་རུའི་གྲོང་ན་དགྲ་གཅིག་ཡོད་པས་དོམ་དོམ་རྒང་དུ་དོན་གཉེར་ལ་འོངས་པས་ཡར་ལམ་རྟས་དྲུད་ནས་ཤི །བླ་མས་ཀྱང་ཆོས་སྐྱོང་ལ་གཏང་རག་གཏང་ནས་དར་ཕྱར། རྟ་བརྒྱུགས་སོ། །བཅོ་ལྔ་པ་ནི་ཆོས་སྐོར་ཆེན་པོ་ཀ་བྲག་དུ་དགུང་ལོ་བཅུ་དྲུག་ལ་མཁན་པོ་ཆེན་པོ་མཆོག་གི་བླ་མ་དང་། སློབ་དཔོན་ཕྱག་སེང་གེ་གྲགས་གཉིས་ལ་རབ་ཏུ་བྱུང་སྟེ་མཚན་དགེ་ཚུལ་ཆོས་ཀྱི་གྲགས་པར་བཏགས་སོ། །ལོ་གཉིས་སུ་དགེ་འདུན་གྱི་བྱ་བ་དང་། གནས་ཆུང་གཅིག་འཛུགས་པའི་ཕྱག་ལེན་མཛད་དོ། །བཅུ་དྲུག་པ་ནི་ཇོ་བོའི་སློབ་མ་ཡོལ་ཆོས་དབང་། དེའི་སློབ་མ་དགེ་བཤེས་ཀྲ་ར་བ་རྡོ་རྗེ་མཆེད་གཉིས་ལ་ཇོ་བོའི་ལུགས་ཀྱི་བདེ་མཆོག་གི་དབང་སྐུར་དང་གསང་སྔགས་ཀྱི་སྒྲུབ་ཐབས་མང་པོ་ཞུས་སོ། །བཅུ་བདུན་པ་ནི་དགུང་ལོ་བཅུ་དགུ་ལ་ལྡོམ་བུའི་ཚུལ་དུ་ཐོས་བསམ་ལ་
1-2-50a
༄༅། །ཡུལ་དབུས་སུ་བྱོན་ནས། གཡོར་པོའི་ཉ་མོ་གྱུར་ན་དགེ་བཤེས་སྟོད་ལུང་རྒྱ་དམར་བཞུགས་པ་དང་། དེའི་སློབ་མ་དགེ་བཤེས་ཕྱ་པ་གཉིས་ལ་དབུ་མ་ཤར་གསུམ་དང་བྱམས་ཆོས་གསན་ནོ། །བཅོ་བརྒྱད་པ་ནི། འཕན་ཡུལ་དུ་དགེ་བཤེས་ཤ་ར་བ་དང་། དེའི་སློབ་མ་རྣལ་འབྱོར་ཤེས་རབ་རྡོ་རྗེ་དང་མཇལ་ནས། ལོ་དྲུག་ཏུ་བཀའ་གདམས་ཀྱི་ཆོས་ལ་ཐོས་བསམ་མང་པོ་ཡང་མཛད་དོ། །བཅུ་དགུ་པ་ནི་མཐོང་བ་ཕུགས་སུ་མཁན་པོ་མལ་འདུལ་བ་འཛིན་པ་ཆེན་པོ་དང་། སློབ་དཔོན་ཡེ་ཤེས་བློ་གྲོས་དང་། གསང་སྟེ་སྟོན་པ་མཁན་པོའི་གཅུང་པོ་དང་གསུམ་ལ་བསྙེན་རྫོགས་མཛད་དོ། །འདུལ་བ་གསན་ནས་གཞན་ལ་ཡ་ད་ལ་ཡང་བཤད་དོ། །ཉི་ཤུ་པ་ནི་རྒྱལ་ལྷ་ཁང་ན་བླ་མ་དཔལ་རྒ་ལོ་དང་། ཁམས་པ་ཨ་སེང་བཞུགས་པ་ལ་སྦྱོར་དྲུག་དང་མགོན་པོ་ནག་པོ་བྱ་རོག་མ་ལ་སོགས་པ་ཞུས་གསུང་ངོ་། །ཉེར་གཅིག་པ་ནི་དྭགས་པོར་བྱོན་ནས་བྲག་ཁ་ཞེས་བྱ་བའི་དགོན་པ་ན། དགེ་བཤེས་ཤ་བ་གླིང་པ་དང་། སློབ་དཔོན་བསྒོམ་ཚུལ་གཉིས་བཞུགས་པ་དང་མཇལ་ནས་གདན་བཞི་གསན་ནོ། །ཉེར་གཉིས་པ་ནི་དགུང་ལོ་སུམ་བཅུ་རྩ་གསུམ་ལ་དྭགས་ལྷ་སྒམ་པོར་བྱོན་པས། ཟླ་བ་གཉིས་ཙམ་དུ་མཇལ་དུ་མ་གནང་། དེ་ནས་མཇལ་དུས་སུ་དར་བཅུ་ཙམ་ཕུལ་ནས་གདམས་ངག་ཞུས་པས། ལམ་རིམ་ཐོ་རེ་བ་ཅིག་གསུངས་ནས། ངས་
1-2-50b
ཀྱང་དེ་བསྒོམས་པ་ཡིན། ད་ཁྱོད་རང་ཡང་དེ་བསྒོམས་གསུང་། ཞུ་སྣ་བ་དང་བདག་གཉེར་ཐམས་ཅད་སློབ་དཔོན་བསྒོམ་པས་མཛད། ཐབས་ལམ་གྱི་གདམས་ངག་གནང་ནས་དེ་བསྒོམས་པས། ཞག་དགུ་ནས་དྲོད་ཆེ་བར་བྱུང་ནས་རས་གོས་རྐྱང་པ་བྱས་ནས་དེར་ཟླ་བ་དགུ་བསྒོམས། དེའི་ཚེ་བླ་མའི་ཞལ་ནས། ཁྱོད་ཟངས་རིར་བསྒོམ་དུ་སོང་གསུངས་ནས་དབྱར་ཟླ་བ་གསུམ་དུ་ཟངས་རིར་བཞུགས་པས་སེམས་ཀྱི་གནས་པ་ཅི་བྱར་ཉན་པ་དང་། ལྷག་མཐོང་སྤྲིན་བར་གྱི་ཉི་ཟླ་ལྟ་བུ་བྱུང་གསུངས། ཡང་བླ་མ་ལ་ཕྱག་བསྐྱེལ་དུ་བྱོན་ནས་སྒམ་པོ་རང་དུ་ལོ་གསུམ་དཀའ་ཐུབ་དྲག་པོ་མཛད་ནས་བསྒོམས་པས། གྲྭ་པ་བརྒྱད་བརྒྱའི་ནང་ནས་བསྒོམ་སྲན་ཆེ་བར་གྲགས། ལམ་རྟགས་ངོ་མཚར་ཅན་མང་པོ་བྱུང་། དགའ་ནས་ཕྱག་བསྐྱེལ་གྱི་དྲི་རྟོག་མཛད་པ་ལ། བྱ་ལྐོག་དགོན་པར་བླ་མའི་སྤྱན་སྔར་བྱོན་ནས་ཞུས་པས། ཨ་ནའོ། ཁམས་པ་སེ་བོ་ཁྱོད་ལ་རེ་ཆེ་བ་ཡིན་པ་ལ། ཁྱོད་ཀྱི་དེ་ནོར་ནས་འདུག་པས་ད་རུང་བསྒོམས་གསུངས་ནས། ནོར་པ་ཡེ་མི་འདུག་པ་ལ་སྙམ་དུ་དགོངས་ནས་སྒམ་པོར་ཟླ་བ་དྲུག་བསྒོམས་པས་བསྐྱེད་ཡེ་མ་བྱུང་༑ ཡང་བླ་མ་ལ་ཞུས་ནས། ལོ་བརྒྱར་བསྒོམས་ཀྱང་ངོ་བོ་ལ་བསྐྱེད་འོང་རྒྱུ་མི་འདུག །ནོར་ཡང་རང་གི་དེ་བསྒོམ་པ་ཡིན་ཞུས་པས། བླ་མ་དགྱེས་ནས། བུ་འཁོར་བ་དང་འབྲེལ་ཐག་ཆོད་པ་ཡིན་གསུངས་
1-2-51a
༄༅། །ནས་གནས་ལུགས་དོན་གྱི་ངོ་སྤྲོད་དང་། རྗེས་སུ་བསྟན་པའི་གདམས་ངག་གསུངས་སོ། །ཉེར་གསུམ་པ་ནི་ཡང་ལོ་རོར་བྱོན་ནས། བླ་མ་རས་ཆུང་པ་དང་མཇལ་ཏེ་ཐུན་འཇོག་དང་ཆོས་དྲུག་ཞུས༑ ནཱ་རོ་པའི་གདམས་ངག་ལ་དྲི་རྟོག་ལེགས་པར་མཛད། རྗེ་མིད་ལའི་སློབ་མ་རྩེ་མོ་ནམ་མཁའ་གསལ་བྱ་བ་ལ་ཡང་གདམས་ངག་ཞུས་སོ། །ཉེར་བཞི་པ་ནི་ཇོ་བོའི་སློབ་མ་རོང་པ་འགར་དགེ །དེའི་སློབ་མ་སྤེན་ཕུག་པ་སྟོན་རྒྱལ་ལ། རྡོ་རྗེ་ཕག་མོ་ཆོས་སྤྱོད་དང་འབྲེལ་བ་དང་། རིན་ཆེན་རྒྱན་སྒྲུབ་དང་། དབང་བཞི་ཉམས་བསྒོམ་ལ་སོགས་པ་ཞུས་སོ། །མེས་ཚོན་པོའི་སློབ་མ་རྒྱབ་མོ་སྤང་ཁ་བ་ལ་དགྱེས་རྡོར་གདམས་བཤད་ལ་སོགས་པ་ཞུས་སོ། །ཉེར་ལྔ་པ་ནི་ཡར་ལུང་ཕུག་མོ་ཆེར་དགེ་བཤེས་རྡོར་སེང་ལ་ལམ་འབྲས་ཞུས། དར་ཡུལ་གྱི་དགེ་བཤེས་རལ་ལྕགས་སྟོན་ཚུལ་ལ། དཔལ་བདེ་མཆོག་དང་། ཟངས་དཀར་ལོ་ཙཱ་བའི་ཆོས་མང་དུ་ཞུས། ཉེར་དྲུག་པ་ནི། ཡང་བླ་མའི་ཞལ་ནས། ཁྱོད་འོལ་ཁར་བསྒོམ་དུ་སོང་གསུངས་ནས། འོལ་ཁར་བྲེའུ་རི་བོ་ཆེར་བྲག་ཕུག་གཅིག་དུ་བྱོན་ཙམ་ན། བུད་མེད་གཅིག་བྱུང་ནས་ཁྱོད་འདིར་མ་སྡོད་ངའི་ཇོ་མོ་འོང་ཟེར། རིན་པོ་ཆེས་བྲག་སྲིན་མོར་དགོངས་ནས་བྱམས་པ་དང་སྙིང་རྗེ་བསྒོམས། དེ་རང་དུ་ཟླ་བ་བཅུ་བཞི་བསྒྲུབ་པ་མཛད་པས་ངེས་ཤེས་ཁྱད་པར་ཅན་ཐུགས་ལ་ལ་འཁྲུངས་
1-2-51b
ནས༑ བློ་བདེ་ཞེས་པ་ལ་སོགས་པའི་མགུར་ཡང་གསུངས། ཉེར་བདུན་པ་དེ་ནས་ཆོས་རྗེ་སྒམ་པོ་པ་ལ་ཟབ་མོའི་དབང་བསྐུར་ཞུས་པའི་དུས་སུ། དགྱེས་པ་རྡོ་རྗེ་བརྗིད་པའི་སྐུ་འོད་ཀྱི་ར་བ་གཅིག་ན་བཞུགས་པར་ཞལ་གཟིགས། ཡང་གྲོགས་མཆེད་བཞིས་བསྒོམ་ཚུལ་ལ་དབང་བསྐུར་ཞུས་པས། བཞི་པོ་མཐོང་སྣང་གཅིག་པར་དཔལ་ཧེ་རུ་ཀར་གཟིགས་ནས། བླ་མ་ཉིད་ལ་ཞུས་པས། ཧེ་རུ་ཀ་ནི་ང་ཉིད་ཡིན་གསུངས་སློབ་དཔོན་སྒོམ་ཚུལ་ལ་དག་སྣང་གཟིགས་པ་དྲུག་ནི། དགྱེས་རྡོར་ལན་གསུམ་དང་། རྡོ་རྗེ་རྣལ་འབྱོར་མ་དང་། འོད་ཕུང་གཅིག་ཏུ་གཟིགས་སོ། །ཉེར་བརྒྱད་པ་ནི། རིན་པོ་ཆེའི་ཞལ་ནས། ཁྱོད་མོན་དུ་བསྒོམ་ལ་སོང་གསུང་ནས། ཚྭ་བྲེ་ལྔ་ཁྱེར་ནས་མོན་གྱི་རྒྱལ་པོ་ག་ཏུང་གི་རྩར་བྱོན་པས། དེའི་བཙུན་མོ་བོད་མོ་གཅིག་གི་ཕ་མིང་དུ་བྱས་ཏེ་ལོ་ཙ་ཡང་བྱས་ནས། ཚྭ་དེས་རྒྱལ་པོ་ལ་ཞལ་མཐོང་ཡང་བྱས༑ བླ་མས་རྒྱལ་པོའི་མཆོད་གནས་བྱས་ཏེ་མོན་གྱི་རི་ལ་བཞུགས། དུས་ཚོད་གཅིག་ན་རྒྱགས་ཆད་ནས་ཡུལ་ན་མར་བཞུད་པའི་ལམ་ཁར་ནགས་གསེབ་ནས་སྟག་གཅིག་བྱུང་ནས། བླ་མ་ཕ་འོང་གཅིག་གི་རྩར་བཞུགས་པ་ལ་སྟག་དེས་བསྐོར་བ་བྱས་ནས་སོང་པ་ལ་དེ ར་འཚེ་བ་མི་བྱེད་པར་འདུག་ནས། མར་བྱོན་པའི་ལམ་ཁར་བུད་མེད་གཉིས་ཀྱིས་དཀུ་བ་ཕྱེད་པ་ཅིག་གི་ནང་བདུད་རྩིས་བཀང་ནས་དྲངས། དེར་
1-2-52a
༄༅། །རྒྱལ་པོའི་ཕོ་བྲང་དུ་བྱོན་ནས་རྒྱགས་བསླངས་ནས་ཡར་རི་ལ་བྱོན། དེའི་ཚེ་མོན་བོད་མཚམས་ཀྱི་མགུར་བཞེངས། དེ་ནས་བོད་དུ་བྱོན་པ་ལ་མོན་གྱི་རྒྱལ་པོ་དེས་རས་ཀྱི་དོག་པ་འགའ་དང་། དུག་སྔགས་ཅིག་བརྗོང་བ་བྱས། དྭགས་པོར་བསླེབས་ནས་བླ་མ་དང་མཇལ་བའི་དུས་སུ། བླ་མའི་ཞལ་ནས། ཁྱོད་ལ་སྟག་གིས་བསྐོར་བ་བྱས་སམ་གསུང་པ་ལ། བྱས་ཞུས་པས། སྟག་དེ་མཁའ་འགྲོ་མའི་སྤྲུལ་པ་ཡིན། བུད་མེད་གཉིས་ཀྱིས་བདུད་རྩི་དྲངས་པ་དེ་ཡང་ཞིང་སྐྱོང་གི་མཁའ་འགྲོ་མ་ཡིན་དངོས་གྲུབ་སྟེར་བ་ཡིན་གསུང་། སྒམ་པོར་དེ་རེས་ལོ་གཅིག་བཞུགས་སོ། །ཉེར་དགུ་པ་ནི། ཡང་བླ་མ་ལ་ང་ཡུལ་ལྟད་གཅིག་ལ་འགྲོ་ཞུས་པས། སོང་ཅིག་གསུང་། དེར་གཉལ་ལ་ལམ་ཕྱུང་ནས་ལྷོ་བྲག་རྒྱུད་ནས་དཔལ་རིར་བྱོན། ཁམས་པ་བཞི་དང་འགྲོགས་ནས་འགོས་ཀྱི་ཕག་རི་ན་ཚུར་ལ་བྱོན་པས། ལ་ཁ་གཅིག་དུ་དཔོན་གཡོག་ལྔ་དྲོ་འདེབས་པས་གཉིས་ཤིང་འཐུར་སོང་། གཉིས་ཐབ་ཀ་བྱེད་པའི་ཚེ། ནམ་མཁའ་ལ་ཐོག་གཅིག་བབས་ནས་མདུན་གྱི་གཉིས་ལ་ཐོག་པས་ཤི །དེ་གཉིས་ཀྱི་དགེ་བ་ལ་བླ་མའི་དྲུང་དུ་བེ་ཕྲུག་གཉིས་ཕུལ། རིན་པོ་ཆེ་ལ་རྨི་ལམ་གྱི་སྣང་བ་ཙམ་ལས་མ་བྱུང་ངོ་། །སུམ་ཅུ་པ་ནི། དེ་ནས་རྩང་ལ་སྟོད་ཀྱི་མདར་མེ་ཉག་གི་ཡུལ་དུ་བྱོན་པས། དེའི་ས་ཕུག་གཅིག་ན་མིད་ལའི་སློབ་མ་དགེ་ཚུལ་སྤུན་
1-2-52b
གཉིས་བཞུགས་ནས་འདུག་པ་ལ་གདམས་ངག་ཞུས་པས། ཆུང་པ་དེས་ཕྱག་རྒྱ་ཆེན་པོ་རྡེའུ་སྐོར་གྱི་གདམས་པ་གནང་བ་ཡིན་གསུང་ངོ་། །སོ་གཅིག་པ་ནི། དེ་ནས་ཡང་འཕན་ཡུལ་བྱ་བཟངས་བྲག་ལ་དབྱར་དགུན་གསུམ་འདག་ཆར་དུ་བསྒྲུབ་པ་མཛད་པས། གཏུམ་མོའི་ཡོན་ཏན་དཔག་ཏུ་མེད་པ་བྱུང་སྟེ། མཚན་ནི་བླ་མ་བྲག་པར་གྲགས། གཞན་སྣང་ལ་རི་དང་བྲག་ལ་ཐོགས་གཏུགས་མེད་པར་འདུག་ཟེར་བ་ཡང་བྱུང་། ཡི་དམ་ལྷ་མང་དུ་ཞལ་གཟིགས་སོ། །སོ་གཉིས་པ་ནི། རིན་པོ་ཆེའི་ཞལ་ནས། ཁྱོད་ཇོ་མོ་གངས་དཀར་ལ་བསྒོམ་དུ་སོང་། དེ་ན་སློབ་དཔོན་པད་མ་འབྱུང་གནས་ཀྱི་དགོན་པ་ཕ་འོང་དཀར་ལེབ་ཀྱི་འོག་ཏུ་དབྱར་དེ་བཅུད་ལེན་མཛད་ཅིང་བཞུགས་པས་ཡོན་ཏན་མང་པོ་རྒྱུད་ལ་སྐྱེས། བླ་མ་ལ་སངས་རྒྱས་ཀྱི་འདུ་ཤེས་སྐྱེས་ནས། རྡོ་རྗེ་ཚིག་དྲུག་པའི་མགུར་བཞེངས། དེའི་དུས་སུ་མཛོ་མོ་དཀར་ཡུ་མ་གཅིག་དུས་རྟག་ཏུ་གཟིགས། སྤྱིར་མོས་གུས་མེད་ན་རྒྱུད་ལ་ཡོན་ཏན་མི་འབྱུང་། ངས་བླ་མ་ལ་ཐ་མལ་པའི་འདུ་ཤེས་འབྱུང་མ་མྱོང་གསུང་། སོ་གསུམ་པ་ནི། དེའི་སྟོན་ཀ་སྟེ་མོ་ཉེ་དྲུང་གི་འཕྲང་ཅིག་ན་མར་འོངས་པས༑ རྫིང་ཁ་ཅིག་ན་ཁང་པ་གཅིག་འདུག་པའི་རྩ་ན་བུད་མེད་བཞི་ཐགས་འཐག་ཅིང་སྣང་། བུད་མེད་གཅིག་ན་རེ། ཇོ་བོ་དྲོ་གསོལ་ལམ་ཟེར་བས། རུང་བྱས། བུད་མེད་གཅིག་ནང་དུ་སོང་ནས་ནང་དུ་བྱོན་
1-2-53a
༄༅། །ཟེར། འདིར་ཁྱེར་ལ་ཤོག་བྱས་པས། ཅང་མི་ཉེས་ནང་དུ་བྱོན་ཟེར། ནང་དུ་ཕྱིན་པས་བུད་མེད་བཞི་ཀ་ནང་ན་འདུག །དཀུ་བ་ཕྱེད་པ་ཐོད་ཕོར་འདྲ་བ་གཅིག་གི་ནང་དུ་བཟའ་བཏུང་དྲངས་པས། ཕྱག་ཚང་མ་དེའི་མཐེ་བོང་ལ་བདེ་མཆོག་ཞལ་བཞི་ཕྱག་བཅུ་གཉིས་པ་ཡུམ་དང་བཅས་པ་གཅིག་གཟིགས། བཟའ་བཏུང་དེ་ཡང་མིའི་སོར་མཛུབ་ཀྱི་ཚོད་མར་འདུག །ཐེ་ཚོམ་མེད་པར་གསོལ་བས་རོ་མཆོག་བརྒྱ་དང་ལྡན་པར་བྱུང་། ཡང་བུད་མེད་དེས་ཕོར་པ་ནམ་མཁའ་ལ་བཟེད་པས་འོ་མའམ་ཆུ་སྐྱ་འདྲ་བས་གང་ནས་འདུག །དེ་ཡང་དྲངས་ནས་གསོལ་བས་རོ་མཆོག་བརྒྱ་དང་ལྡན་པ་གཅིག་བྱུང་། སྒོར་བྱོན་ཙམ་ན་བུད་མེད་བཞི་ཀ་ཕྱི་སྒོ་ན་ཐགས་འཐག་ཅིང་སྣང་། དེ་ནས་མར་ལ་བྱོན་པའི་ལམ་དུ་ས་གཞི་དར་གྱི་འབོལ་ལྟར་འཇམ་ཞིང་། སྐུ་རས་བལ་ལྟར་ཡང་ལ། ཡིད་ངོས་བཟུང་མེད་པར་དགའ་བ་བྱུང་ངོ་། །སོ་བཞི་པ་ནི། གཞུ་སྙེ་གཉིས་ཀྱི་བར་ན་རྫོང་བྱ་བའི་དགོན་པ་གཅིག་ན་བསྒོམ་མ་གཅིག་གིས་ཕྱུགས་འཚོ་བ་དང་ཕྲད་པས་དགོན་པ་ཡ་ཀི་ན་སུ་བཞུགས་དྲིས་པས། ངའི་སློབ་དཔོན་བཞུགས་ཟེར། འོ་ན་མཇལ་བར་ཞུ་དང་བྱས་པས། མཚམས་བྱས་ཟེར། ཅིས་ཀྱང་མཇལ་བར་ཞུ་དང་བྱས་པས། ངས་བླ་མ་ལ་དྲིར་འགྲོ་ཟེར། ནང་དུ་སོང་ནས་ཕྱིར་བྱུང་སྟེ་ནང་དུ་བྱོན་ཟེར། ནང་དུ་ཕྱིན་པས་བཙུན་རྒན་ཕོ་མོ་
1-2-53b
གཉིས་སྣང་། ཕྱག་བྱས་པས་དེ་ལྟར་མ་བྱེད་བཙུན་མ་ལ་ལྟོས་ཟེར་བའི་བརྡ་མཛད། དེ་ལྟར་གསུང་ཡང་ཕྱག་བྱས། དེ་ནས་ཇ་གྲལ་དུ་བླ་མ་རྫོང་པའི་ཞལ་ནས། ཁྱོད་ལ་དེ་རིང་བུད་མེད་བཞིས་དྲོ་དྲངས་སམ་གསུང་༑ དྲངས་བྱས་པས། བླ་མའི་ཞལ་ནས། བུད་མེད་ཀུན་མཁའ་འགྲོ་མ་ཡིན། ཚོད་མའི་རྒྱུ་དེ། བལ་ཡུལ་ཕམ་མཐིང་ན་ཁྱིམ་བདག་ཨ་ཤོ་ཀའི་བུ་དྷརྨ་སིདྡྷི་བྱ་བ་ཤི་བའི་རོ་ཏརྟི་ཏའི་དུར་ཁྲོད་དུ་བསྐྱལ་བ་མཁའ་འགྲོ་མས་སྐད་ཅིག་དེ་ཉིད་ལ་བླངས་པ་ཡིན། ད་ལྟ་དེ་ན་ཡོད་དམ་དྲིས་པས། དེ་ན་མེད། ཁ་ཆེའི་གྲོང་ཁྱེར་སམྦྷ་ཏ་བྱ་བའི་དུར་ཁྲོད་ན། ཟླ་བ་ནག་པོའི་ཉི་ཤུ་ལྔ་ལ་མཁའ་འགྲོ་མ་འདུ་བའི་གནས་ཡིན་པས་ཚོགས་འཁོར་ལ་དེར་སོང་ཟིན། ཁྱེད་ལ་མཁའ་འགྲོས་མས་དངོས་གྲུབ་སྟེར་བ་ཡིན་གསུང་། རིན་པོ་ཆེས། ཁོང་གི་དགོན་པ་འདི་བླ་མའི་འཕར་ཚང་དགོན་པ་འདྲ་སྙམ་དུ་སེམས་པས། བླ་མ་རྫོང་པའི་ཞལ་ནས། ཁྱེད་ཀྱི་བླ་མའི་འཕར་ཚང་དགོན་པ་དེ་འདི་འདྲ་འམ་གསུང་། དེར་བསམ་མནོ་བྱེད་མ་སྤོབས་གསུང་། དེ་ལ་སོགས་པ་བླ་བོ་མང་པོ་ཡང་གསུང་། ཁྱོད་ཀྱིས་བླ་མ་ལྷ་རྗེ་ཅི་གསུང་གྱིས་ཅིག་གསུང་ལུང་ཡང་བསྟན། ཁོང་ལ་ཕྱག་རྒྱ་ཆེན་པོ་ཐོག་བབས་དང་མན་ངག་མང་དུ་ཞུས། དེ་ནི་ནཱ་རོ་པའི་སུམ་སློབ་ཡིན་ནོ། །སོ་ལྔ་པ་ནི། གྲུ་བཞི་དགོན་པར་བཞུགས་དུས་ན། ཆོས་རྗེ་སྒམ་པོ་པ་སྐུ་ཡལ་ནད་ཐོས་
1-2-54a
༄༅། །ནས། བཞུད་པས། ཕོ་རོག་རྫོང་ཆུང་བྱ་བ་འོལ་ཁའི་དགོན་པ་དེར། བླ་མ་བསྒོམ་ཚུལ་དང་། སློབ་དཔོན་འཕགས་པ་གཉིས་དང་མཇལ་ནས། བླ་མ་བསྒོམ་ཚུལ་གྱི་ན་བཟའ་ལ་འཇུས་ནས་སྤྱན་ཆབ་ཕྱུང་བས། རྗེ་བཙུན་གོང་མས། ཁོ་བོའི་གདུང་བ་བསལ་བའི་ཕྱིར། འཇའ་ཚོན་གྱི་རྣམ་པར་ནམ་མཁའ་ལ་བྱོན་པ་དཔོན་སློབ་གསུམ་ཀས་མཐོང་ནས་ཕྱག་བཙལ་བས་དེ་ཉིད་དུ་ཡལ་གསུང་། སོ་དྲུག་པ་ནི༑ གྲུ་བཞི་དགོན་པར་བཞུགས་པའི་ཚེ། ཐུགས་དམ་དོན་ཡོད་ཞགས་པའི་བསྙུང་གནས་མང་པོ་མཛད། ཁྱད་པར་དུ་རྡོ་རྗེ་ཕག་མོའི་བསྙེན་བསྒྲུབ་མང་པོ་མཛད་པས། ཞལ་གཉིས་མ་འཁོར་དང་བཅས་པ་ཞལ་གཟིགས་སོ། །སོ་བདུན་པ་ནི། གྲུ་བཞི་དགོན་པ་ན་ནུབ་གཅིག་གི་རྨི་ལམ་ན། སྦྲུལ་ཆེན་པོ་གཅིག་གིས་རིན་པོ་ཆེ་དེད་པས། དམའ་བ་རྒྱ་མཚོའི་གཏིང་དང་། མཐོ་བ་རི་རབ་ཀྱི་རྩེ་མོར་བྲོས་ཀྱང་དེར་སླེབས་ནས། ནམ་མཁའ་ལ་འཕུར་བར་བྱས་པས། སྦྲུལ་དེས་མིད་ནས་ཕྱི་མིག་བལྟས་པས་མཐེབ་ཆེན་ཕྱིར་ལུས་པ་གཅིག་རྨིས་པས། ཉེ་གནས་པ་ཇོ་བོ། ཡེ་ཤེས་འོད་རྩར་བྱུང་ནས། བསྒོམ་ཆེན་པ་བགྲེས་པོ་གཟིམས་པ་ནི་མི་འདྲ་བར་འདྲེས་ནོན་པ་འདྲ་ན་ཅི་ཡིན་ཟེར། རྨི་ལམ་འདི་འདྲ་བ་གཅིག་རྨིས་ཏེ། ཕལ་དུ་ཁྱོད་ཀྱི་འདྲེ་ཡིན་གསུང་། དེ་ནས་ཞག་འགའ་ལོན་ཙམ་ན་ཉེ་གནས་ལ་འདི་སྐད་དུ། རྨི་ལམ་དེ་
1-2-54b
བཟང་པོ་ཡིན་པར་འདུག །སྔར་ཏིང་ངེ་འཛིན་ལ་དྲན་པས་འཛིན་དགོས་པ་ལ། དེ་རྨིས་ནས་མ་དགོས་ཏེ། དེ་ཡང་ཞག་འགའ་འཛིན་དགོས་པར་བྱུང་སྟེ། མཐེབ་ཆེན་ལུས་པ་དེ་ལ་ལྟ་བར་འདུག །རྩ་རླུང་སེམས་ཀྱི་རྟེན་འབྲེལ་གྱིས་རླུང་སེམས་ཨ་བ་དྷུ་ཏིར་ཚུད་པའི་རྟགས་སུ་འདུག་གསུང་། དེ་ནས་བྱིས་པ་ཆུང་ངུའི་སྤྱོད་པ་བྱེད་པ་གཅིག་བྱུང་སྐད། སོ་བརྒྱད་པ་ནི། མཚུར་གྱི་ངོས་བཟངས་སུ་ཚེམས་བསྙུང་བས། དེ་ལ་ཚེམས་ཆུང་མང་པོ་བྱོན། ཇི་ཞིག་ལྟར་ལ་རིང་བསྲེལ་དུ་གྱུར་ཏེ། མཆོད་རྟེན་དང་རྡོ་རྗེ་ལྟ་བུ་དང་ཉུངས་ཀར་གྱི་གཟུགས་ལ་སོགས་པ་དཔག་ཏུ་མེད་པ་རྣམས་གཞན་གྱི་རྐྱེན་གྱིས་འཕེལ་བ་དང་གཤེགས་པ་ཡང་བྱུང་། ཁྱད་པར་དུ་དཔལ་ཧེ་རུ་ཀ་དང་རྡོ་རྗེ་རྣལ་འབྱོར་མ་དང་ཁར་ས་པ་ཎི་གསུམ་གྱི་སྐུ་བྱོན། སོ་དགུ་པ་ནི། རྗེ་སྒམ་པོ་པའི་ཞལ་ནས། ཁྱོད་ལན་ཅིག་སྐམ་པོ་གངས་རར་སོང་གསུང་། ངས་འགྲོ་བར་བརྩམས་ནས་འོལ་ཁའི་དམིག་མངས་སུ་སླེབ་ཙམ་ན་ཞབས་བསྙུང་བ་དང་ཆོས་སྐྱོང་གིས་འགྲོར་མ་སྟེར་གསུང་། དུས་ཕྱིས་བླ་མ་བསྒོམ་པའི་ཞལ་ནས་ཀྱང་། བླ་མའི་གསུང་ཡིན་པས་སྐམ་པོ་གངས་རར་སོང་ལ་སྐྱིད་རུང་སྡུག་རུང་ཡར་ཤོག་གསུང་། དེར་ཏྲེ་བོའི་མགྲོན་པོ་རྒྱ་ཨ་སྐྱབས་ཀྱིས་སྤྱན་འདྲེན་བྱས་ཏེ་བྱང་ལམ་ན་མར་ལ་བྱོན་པའི་དུས་ན། ནུབ་གཅིག་གི་རྨི་ལམ་ན། བུད་མེད་ཀྱི་རོ་ཚོན་པོ་གཅིག་རྙེད་ནས་
1-2-55a
༄༅། །བཤས་པས་རྩིབ་མའི་རྩ་བ་ན་ཡར་ལ་ཌཱ་མ་རུའི་སྒྲ་རང་གྲགས་སུ་ནམ་མཁའ་ལ་སོང་པའི་ཟླ་ན་རིན་པོ་ཆེས་ཀྱང་བྱོན་པས་ཨུ་རྒྱན་དུ་བསླེབས་ནས་བུད་མེད་གཅིག་ན་རེ། འདི་ཡན་ཆད་ཡེ་ཤེས་ཀྱི་མཁའ་འགྲོ་མའི་གླིང་ཡིན། འདི་མན་ཆད་འཇིག་རྟེན་གྱི་མཁའ་འགྲོ་མའི་གླིང་ཡིན་ཟེར། རྗེས་སུ་བསྟན་པའི་མན་ངག་གསན་ནོ། །བཞི་བཅུ་པ་ནི། གནས་ནང་དུ་དགྱེས་རྡོར་ལྷ་དགུའི་དཀྱིལ་འཁོར་ཞལ་གཟིགས༑ དགྱེས་རྡོར་གྱི་བསྟོད་པ་རྐང་བརྒྱད་དང་བར་དོའི་གདམས་པ་ཡང་གསན་གསུང་། ཞེ་གཅིག་པ་ནི། གནས་ནང་དུ་དཔལ་དགྱེས་རྡོར་ལྷན་སྐྱེས་ཞལ་གཟིགས། ཞེ་གཉིས་པ་ནི། པོམ་ཕུག་ཏུ་ལྷོ་ཕྱོགས་དཔལ་གྱི་རི་ལ་རྡོ་རྗེ་རྣལ་འབྱོར་མ་གཅེར་བུ་སྐྲ་གྲོལ་བ་བདེ་བའི་ཉམས་ཅན། ཐོད་པ་དང་གྲི་གུག་བསྣམས་ནས་ཕྱག་གཡས་པའི་གྲུ་ཁུགས་སུ་ཞབས་གཡས་པ་བཅུག་པ་རྒྱན་མེད་པའི་མཁའ་སྤྱོད་མ་གཟིགས༑ ཞེ་གསུམ་པ་ནི། གནས་ནང་དུ་སྒྲོལ་མ་ཡིད་བཞིན་འཁོར་ལོ་གཟིགས། ཞེ་བཞི་པ་ནི། དུས་ཚོད་གཅིག་ནི་རྡོ་རྗེ་གདན་གྱི་བྱང་ཕྱོགས་མ་ཧེ་རྒྱུ་བའི་གནས་སུ་རིན་པོ་ཆེ་བྱོན་པས། སློབ་དཔོན་བསྒོམ་པ་དང་མཇལ་བས། ཁྱོད་འདིར་འོང་བའི་ནུས་པ་ཡོད་དམ་གསུང་། གསུང་གླེང་ལངས་དང་གདམས་ངག་མང་པོ་ཡང་གསན་པ་ལགས་སོ། །ཞེ་ལྔ་པ་ནི། གནས་ནང་དུ་རྡོ་རྗེ་རྣལ་འབྱོར་མ་དབུ་སྟོང་
1-2-55b
ཕྱག་སྟོང་དཔའ་མོ་སུམ་བཅུ་སོ་དྲུག་གིས་བསྐོར་བ་ཞལ་གཟིགས། གཙོ་མོའི་ཞལ་ནས། འདི་ན་ཧེ་རུ་ཀ་དཔལ་རྒྱུ། །སེམས་ནི་དྲི་མ་མེད་པར་འདོད། །དག་པ་ཆོས་ཀྱི་སྤྲུལ་པ་ནི། །ཕག་མོའི་གཟུགས་སུ་བྱུང་པ་ཡིན་གསུང་། ཞེ་དྲུག་པ་ནི། གནས་ནང་དུ་སྟོན་ཟླ་ར་བའི་ཉ་ལ་བླ་མའི་འདས་མཆོད་མཛད་པས། ཉི་མ་ཕྱེད་ཡོལ་ནས་ནམ་མཁའ་ལ་འཇའ་ཚོན་གདུགས་དང་དཀྱིལ་འཁོར་འདྲ་བ་མང་པོ་བྱུང་པའི་སྣ་ལ། བླ་མ་རིན་པོ་ཆེ་དང་ཉེ་གནས་ལེགས་མཛེས་གྲགས་མཛེས་རྣམས་གཙོ་འཁོར་དུ་བཞུགས་ཏེ། བླ་མའི་ཞལ་ནས། བུ་གཉིས་སུ་མེད་པ་ལྟ་བའི་དོན། །ཡེངས་པ་མེད་པ་བསྒོམ་པའི་དོན། །ཟུང་དུ་འཇུག་པ་སྤྱོད་པའི་དོན། །དེ་གསུམ་དབྱེར་མེད་འབྲས་བུ་ཡིན། །གསུངས་ནས་ཡལ་ལོ། །ཞེ་བདུན་པ་ནི། གནས་ནང་དུ་ནམ་མཁའ་ལ་ཨཱ་ལཾ་ཀཱ་ལིའི་གཟུགས་མང་པོ་བྱོན་པའི་རྗེས་ལ་བདག་མེད་མ་ལྷ་མོ་བཅོ་ལྔ་གཟིགས༑ ཞེ་བརྒྱད་པ་ནི། གནས་ནང་དུ་བཞུགས་པའི་ཚེ། སེང་གེ་གླིང་དུ་ཐུགས་དགོངས་བཏང་པས། དུར་ཁྲོད་གཅིག་ཏུ་སློབ་དཔོན་རྡོ་རྗེ་དྲིལ་བུ་པ་དང་མཇལ་ནས་གསོལ་བ་བཏབ་པས་ཐེབས་སོ། །ཞེ་དགུ་པ་ནི། གནས་ནང་དུ་འཕགས་པ་མི་གཡོ་བ་དང་ལྷ་མོ་བདག་མེད་མ་ཞལ་སྦྱོར་གྱི་ཚུལ་དུ་གཟིགས། ལྔ་བཅུ་པ་ནི། གནས་ནང་དུ་རྨི་ལམ་དུ་དགེ་སློང་སྐུ་མདོག་དཀར་པོ་གཅིག་བྱུང་ནས། སངས་རྒྱས་ལ་
1-2-56a
༄༅། །ཆོས་ཉན་དུ་འདོང་གསུང་། བླ་མའི་ཐུགས་ལ། མར་མེ་མཛད་དང་ཤཱཀྱ་ཐུབ་པ་ནི་མི་བཞུགས། རྒྱལ་བ་བྱམས་པ་ཡིན་ནམ་དྲིས་པས་ཡིན་ཟེར། དེར་ཉི་མའི་འོད་ཟེར་གྱི་སྟེང་ན་ཕར་ལ་ཕྱིན་པས་དགའ་ལྡན་དུ་སླེབ་པ་དང་། བྱམས་པ་ལོངས་སྤྱོད་རྫོགས་པའི་སྐུའི་ཆ་བྱད་ཀྱིས་དགེ་སློང་སྐུ་མདོག་དཀར་པོ་ཤ་སྟག་ལ་ཆོས་གསུང་གི་འདུག་པ་ནི། འདི་ལ་བསལ་བ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་གྲོལ་བར་འགྱུར། །ཞེས་པ་ཡང་ཐོས། བྱང་ཆུབ་མཆོག་ཏུ་སེམས་བསྐྱེད་པ་ཡང་ཞུས་གསུང་། ང་གཅིག་པ་ནི། གནས་ནང་དུ་ཁྲོ་བོ་བདུད་རྩི་འཁྱིལ་པ་ལྷ་དགུ་ཡབ་ཡུམ་ཞལ་སྦྱོར་གཟིགས་སོ། །ང་གཉིས་པ་ནི། གནས་ནང་དུ་རྨི་ལམ་ན་བྲག་བརྩེགས་མ་བརྒྱའི་སྟེང་ན་བླ་མ་བདེ་བའི་ཉམས་ཀྱིས་བཞུགས་པ་ལ་མཁའ་འགྲོ་མ་རུས་པའི་རྒྱན་ཅན་བརྒྱད་ཀྱིས་མེ་ཏོག་ཕྲེང་བ་ཕྱག་ཏུ་ཕུལ་བས་དེ་རྣམས་ནམ་མཁའ་ལ་གཏོར་བས་རིན་པོ་ཆེའི་པདྨ་བརྩེགས་པའི་ཁང་པར་གྱུར་ཏོ། །ང་གསུམ་པ་ནི། གནས་ནང་ན་བདེ་ཆུང་སངས་རྒྱས་ཀྱིས་ལྷོ་སྟོད་དུ་ལྡོམ་བུ་ལ་སོང་བས། དྭགས་ལྷ་སྒམ་པོར་བླ་མའི་གདན་ས་ཞིག་ཟེར་བ་ཐོས་ནས་བྱུང་། རིན་པོ་ཆེས་དགོངས་པ་བཏང་ནས་གཟིགས་པས། དང་པོ་དྭགས་པོ་གསལ་བ་དང་། དེ་ནས་བལ་ཡུལ་དང་སྟེང་འོག་ཕྱོགས་
1-2-56b
མཚམས་མང་པོ་ན་སངས་རྒྱས་ཀྱི་ཞིང་ཁམས་མང་པོ་དང་། བཅོམ་ལྡན་འདས་ཤཱཀྱ་ཐུབ་པ་ལ་སོགས་པའི་སངས་རྒྱས་དང་བྱང་ཆུབ་སེམས་དཔའ་ནམ་མཁའ་གང་བ་གཟིགས་ཏེ། གདན་ས་ཞིག་པ་མི་བདེན་པར་འདུག་གསུང་། ང་བཞི་པ་ནི། གནས་ནང་དུ་རྨི་ལམ་དུ་རྒྱ་གར་གྱི་རི་བྱ་སྐྱིབས་ཅན་ན་བླ་མ་ལྷ་རྗེ་བཞུགས་པ་དང་མཇལ། བླ་མ་རྫུས་སྐྱེས་ལགས་སམ་ཞུས་པས་མངལ་སྐྱེས་ཡིན་གསུང་། སློབ་དཔོན་བདོག་གམ་ཞུས་པས་གཉུག་མ་ལ་རྒྱུན་ཆད་མེད་པ་ལ་སློབ་དཔོན་མི་དགོས་གསུང་། ཆོས་ཞུས་པས། སྐྱེས་པའི་ཡུལ་དེ་སྤངས་ན་ཆགས་སྡང་བྲལ་བར་ངེས། ཚུལ་ཁྲིམས་དོན་དང་ལྡན་ན་བདེ་འགྲོ་ཐོབ་པར་ངེས༑ ༑ཐབས་ལ་ནན་ཏན་བྱས་ན་ལམ་དེ་ཐོབ་པར་ངེས། །མ་བཅོས་རང་སར་བཞག་ན་དོན་དེ་རྟོགས་པར་ངེས། །ཞེས་གསུང་ངོ་། །ང་ལྔ་པ་ནི། གནས་ནང་དུ་མ་ཧཱ་མ་ཡ་ལྷ་ལྔ་ཞལ་གཟིགས། ང་དྲུག་པ་ནི། གནས་ནང་དུ་ནུབ་གཅིག་གི་རྨི་ལམ་ན། མཚོ་ཆེན་པོའི་ནང་དུ་པདྨ་སྐྱེས་པའི་ནང་ན་རིན་པོ་ཆེ་བཞུགས་པ་ལ། ཕྱོགས་མཚམས་སྟེང་འོག་ནས་དགྱེས་པ་རྡོ་རྗེའི་ལྷ་མོ་བརྒྱད་ཀྱིས་པི་ཝང་སྦྲེང་བའི་སྒྲ་ལ། ནུབ་ཀྱི་ཆ་ཕྱོགས་ནས་བདེ་བ་ཆེ། ཞེས་སྤྱན་འདྲེན་པ་ལ་འཆི་རྟགས་བཟློག་པ་ཡིན་གསུང་། ང་བདུན་པ་ནི། གནས་ནང་དུ་ཡོན་བདག་སྐྱ་དགོན་གྱིས་རབ་གནས་ཞུས་པའི་སར་བཞུད་པའི་ལམ་ཁར་དཔལ་ལྷ་མོ་
1-2-57a
༄༅། །ལ་སོགས་པའི་ཆོས་སྐྱོང་སྤྲིན་ཕུང་ཙམ་གཟིགས། ང་བརྒྱད་པ་ནི། རབ་གནས་དངོས་གཞིའི་ཚེ། ནམ་མཁའ་ལ་ཌཱ་མ་རུ་དང་ཨཱ་ལི་ཀཱ་ལྀའི་སྒྲ་གྲགས། ཡར་ལྟས་པས་ལྷ་ཚོགས་མང་པོ་གཟིགས་ཏེ༑ ཆོས་གསན་པ་ནི། ལྟ་བསྒོམ་ནམ་མཁའ་ཆུ་དང་མཚུངས། །སྤྱོད་པ་དགག་མེད་བསྒྲུབ་ཏུ་མེད། །དེ་གསུམ་དབྱེར་མེད་གཉུག་མ་ཡིན། །ཀུན་རྫོབ་པི་ཝང་སྒྲ་དང་མཚུངས། །དེ་དོན་དེ་ཉིད་དབྱེར་མེད་ཡིན༑ ༑ཞེས་པ་དང་། སྤྱིར་ཡང་གཞན་སྣང་ལ་མེ་ཏོག་རང་འཐོར་ལ་སོང་ནས་རྟེན་ལ་ཆགས་པ་དང་། རྟེན་འགུལ་བ་དང་། གཡོ་བ་དང་། འོད་དང་སྒྲ་ལ་སོགས་པ་བྱུང་པ་བརྗོད་ཀྱིས་མི་ལང་ངོ་། །ང་དགུ་པ་ནི༑ གནས་ནང་དུ་གངས་ཆེན་པོ་གཅིག་གི་སྟེང་དུ་སྤྲིན་ནག་པོའི་ནང་ན། གྲི་གུག་མང་པོ་ཚུབ་པའི་དབུས་སུ་མགོན་པོ་གྲི་གུག་མ་གཟིགས་སོ། །དྲུག་ཅུ་པ་ནི། གནས་ནང་དུ་རིན་པོ་ཆེའི་ཞལ་ནས། ལན་ཅིག་སྔོན་གྱི་བྲམ་ཟེ་ཆེན་པོ་ལ་སོགས་པ་དང་། ཕྱིས་ཀྱི་མེད་ལ། བླ་མ་ལྷ་རྗེ་ལ་སོགས་པའི་བླ་མ་རྣམས་ཚོགས་འཁོར་གཅིག་བྱེད་པ་ལ་འཛོམ་ནས་ང་དང་ཞལ་མཇལ་བ་ཡིན་གསུང་པ་ལགས་སོ། །རེ་གཅིག་པ་ནི༑ གནས་ནང་དུ་རྨི་ལམ་ན། ཁ་ཆེའི་གྲོང་ཁྱེར་གྲིབ་གཏན་གཟིགས་པར་བཞེད་ནས་སྐུ་སྟོང་དང་བརྒྱ་ལ་སོགས་པ་དུ་མར་སྤྲུལ་ནས། ངང་པ་དང་སེང་གེའི་ཁྲི་ལ་བཞུགས་ཏེ། ནམ་མཁའ་ལ་གྲོང་ཁྱེར་དེའི་
1-2-57b
སྟེང་དུ་སླེབ་པ་དང་། སྐྱེ་བ་མེད་པའི་སྒྲ་སྙན་པ་མང་པོ་གྲག་གོ །རེ་གཉིས་པ་ནི། གནས་ནང་དུ་རྒོངས་མོ་གཏོར་མ་ཐོན་པའི་རྗེས་ལ། ཉེ་གནས་སྨོན་ལམ་བླ་མ་དང་གསུང་གླེང་མཛད་ཅིང་བཞུགས་པའི་དུས། ཤིང་ལེབ་སྟེང་ཁང་གི་ཐོག་ན་མར་འོད་དམར་པོ་གཅིག་བྱུང་པ་དང་། རིན་པོ་ཆེའི་ཐུགས་མི་གསལ་ཞིང་འཐོམས་པ་འདྲ་བ་གཅིག་བྱུང་སྟེ། རྨི་ལམ་ཡིན་སྙམ་ཙ་ན་སངས་རྒྱུ་གཅིག་བྱུང་སྟེ། མིའི་མིང་ལ་སོགས་པ་བརྗོད་ནས་འདུག་སྟེ། ཉེ་གནས་ལ་དྲིས་པས། བཙུན་ཚུང་ལག་བདེ་བ་འདིའི་མིང་དང་། འདིའི་མཁན་པོའི་མིང་ཅི་ཡིན་གསུང་། ཁོའི་མིང་ནི་གྲགས་པ་ཤེས་རབ། མཁན་པོའི་མིང་ནི་བརྩོན་འགྲུས་ཤེས་རབ་ཡིན་བྱས་པ་དང་། སྣང་བ་ཐམས་ཅད་བྱུང་སྟེ་གཟའི་བར་ཆོད་མ་ཚུགས་པར་གདའ་ལགས་སོ། །རེ་གསུམ་པ་ནི། གནས་ནང་དུ་རིན་པོ་ཆེའི་ཞལ་ནས། གངས་ཀྱི་ཆུ་འདིས་ལྦ་བ་ཡོང་ན། དབུས་སུ་འགྲོ་ཡང་རན་པར་འདུག་གསུངས་པས། དེ་ནུབ་རྨི་ལམ་དུ་དགེ་བསྙེན་རྡོ་རྗེ་དཔལ་བརྩེགས་མི་རྟ་དཀར་པོ་ཅན་ཐལ་མོ་སྦྱར་ཏེ། མགུར་ཆུའི་སྨན་ལྡུམ་སྨན་བརྒྱད་པོ་འདིས་ཕན་ཟེར་ནས་སྨན་བསྟན། དུས་རྟག་ཏུ་བཞུད་དགོས་མི་གསུང་པར་ཞུ། བློ་མི་བདེ་བར་འདུག་ཟེར་ནས་སོང་། ཕྱིས་ཡང་བཞུད་གསུངས་པས། དགེ་བསྙེན་དེས་རླུང་གི་ཐོག་ཆེན་པོ་ཕབ་པས་ཐང་ཤིང་མང་པོ་འགྱེལ་བས་ལམ་གཅད་པ་དང་། 
1-2-58a
༄༅། །ཏྲེའོ་རྒྱུག་ཐག་གི་ཕ་འོང་མང་པོ་གས་པ་ལ་སོགས་པའི་ཆོ་འཕྲུལ་མང་པོ་བསྟན་ཏོ། །རེ་བཞི་པ་ནི། དགུང་ལོ་བདུན་བཅུ་རྩ་བཞི་ལ་སྐམ་པོ་ནས་གཞི་བཏེག་སྟེ། གཞན་དོན་ལ་འབྲི་ཀླུང་ནས་ཡར་བྱོན་ནས་སྦས་ཡུལ་སག་ཏེར་དགུན་དེ་བཞུགས། དེའི་དགེ་བཤེས་བྱ་སྐྱེ་བ་ལ་སོགས་པ་སྨིན་པར་མཛད། རྟ་མགྲིན་ལྷ་ལྔ་ཞལ་གཟིགས་སོ། །རེ་ལྔ་པ་ནི། དབྱར་དེ་ལྡོངས་གྲར་བཞུགས་ནས། འབྲི་དམ་པ་ཆོས་ཕྱུག་གི་དགེ་འདུན་ཐམས་ཅད་དེར་འཚོགས་པས་སྨིན་གྲོལ་གྱི་ལམ་ལ་བཀོད་དོ། །ཡང་ཏྲེར་བྱོན་ནས་ཟླ་བ་བཅོ་བརྒྱད་བཞུགས་ནས་འགྲོ་བ་རྣམས་སྨིན་ཅིང་གྲོལ་བར་མཛད་ནས། སྒམ་པོར་གཡུ་ཆེན་པོ་བདུན་དང་། ཇ་བཞི་བཅུ་ཞེ་གཉིས་ཀྱི་འབུལ་བ་བསྐུར། དེ་ནས་འབྲི་ཀླུང་དུ་བྱོན་ནས་ཅེ་བར་དུ་བཞུགས་པས་རབ་བྱུང་སྟོང་ཚོ་རེ་ཙམ་འཚོགས་པས་ཐམས་ཅད་སྨིན་གྲོལ་ལ་བཀོད། ཡང་ཟླ་སྨན་དུ་བྱོན་ནས་སླེ་ཏུ་ཀར་མར་བཞུགས་ནས་མི་མཐུན་པ་རྣམས་བསྡུམས། བཙོན་ཐམས་ཅད་བཀྲོལ། འགྲོ་བ་མང་པོ་ལ་ཕན་ཐོགས་ཏེ། སྒམ་པོར་གསེར་འབུམ་གཅིག་དང་གཡུ་དངུལ་འགའ་བསྐུར། དེ་ནས་འགྲོ་དོན་མཛད་ཅིང་ལྷོ་རྒྱུད་དུ་ལམ་ཕྱུང་ནས་ཡུལ་དབུས་སུ་བྱོན། སྤྱིར་སྒམ་པོར་གསེར་གྱི་གླེགས་བམ་བརྒྱ་དང་བཅུ་ཐམ་པ། གཡུ་ཆེན་བཅུ་དང་མཛོ་རྟ་ལྔ་བཅུ་ལ་སོགས་པ་ཕུལ། ཇོ་བོ་ཡི་གེ་དྲུག་པ་དང་ལྷ་སའི་
1-2-58b
ཤཱཀྱ་མུ་ནེས་དབུ་མཛད་པའི་དབུས་གཙང་གི་སྡེ་དགོན་དགེ་བཤེས་རྣམས་ལ་རྟ་བདུན་བཅུ་ལ་སོགས་པའི་ནོར་ཆེན་བརྒྱ་ལྷག་པ་གཅིག་གི་འབུལ་བ་མཛད། རེ་དྲུག་པ་ནི། དེར་མཚུར་གྱི་ལྷ་ལུང་དུ་བཞུགས་པས༑ བྱ་ལོའི་དཔྱིད་ཟླ་ར་བའི་ཉིན་གཅིག་རིན་པོ་ཆེའི་གསུང་ནས། མདང་ནི་རྒྱ་གར་གྱི་དུར་ཁྲོད་གཅིག་ན་རྣལ་འབྱོར་པ་འགའི་ཚོགས་གྲལ་དུ་བྱོན་པ་རྨིས་གསུང་། དེའི་ཚེ་ཡི་གེ་དྲུག་པ་ཞལ་གཟིགས། རེ་བདུན་པ་ནི། རྒྱ་གར་གྱི་ཡུལ་དང་དུར་ཁྲོད་དང་ཚོགས་ཀྱི་ཡོན་བདག་རྣམས་དྲིས་པས། རིན་པོ་ཆེའི་ཞལ་ནས། ཡུལ་རྒྱ་གར་ལྷོ་ཕྱོགས་ཛཱ་ལནྡྷ་ར་ན། དུར་ཁྲོད་ཧ་ཧ་སྒྲོག་པ་ན། ཡོན་བདག་རྒྱལ་པོ་ཟླ་བ་རྣམ་པར་གནོན་པ། ཚོགས་དཔོན་ནག་པོ་སྤྱོད་པ་བ་སྟེ། གཞན་ཡང་གྲུབ་པ་ཐོབ་པ་ཨིནྡྲ་བོ་དྷི་དང་། ཛཱ་ལནྡྷ་ར་དང་། ཤིང་ལོ་པ་བཞི་རྒྱ་གར་བ་ཡིན། བོད་ནས་ཀྱང་དྷརྨ་ཤཱི་ལ་དང་། ཀཱིརྟི་གཉིས་ཡོད། ལམ་ནི་རྩང་ལ་སྟོད་ནས་པུ་རངས་ལ་ཕྱིན་པ་རྨིས་གསུང་། རེ་བརྒྱད་པ་ནི། དེ་དང་དུས་མཚུངས་པར། རྩང་ལ་སྟོད་ཐང་ཆུང་བྱ་བའི་གཙུག་ལག་ཁང་ན། སྡེ་པ་དེའི་སྟོན་པ་གཅིག་ན་བཟའ་ཐང་པ་འདྲུབ་པའི་སྣང་བ་ལ༑ ཨ་ཙ་ར་རས་རྐྱང་གོན། ཐོད་པ་ཐོགས་པ་གསུམ་དང་། བོད་ཀྱི་རྣལ་འབྱོར་པ་རས་རྐྱང་ཅན་ཐོད་པ་དང་སྦའི་བེར་མ་ལྕག་ཐོགས་པ་དུང་གི་རྣ་ཆ་ཅན་ཞབས་རྗེན་དུ་འདུག་པ། ལོ་དྲུག་བཅུ་ཙམ་ལོན་པ་
1-2-59a
༄༅། །གཅིག་དང་བཞི་བྱོན། བོད་དེ་དང་སྟོན་པ་གཉིས་བླ་བོ་མང་དུ་བྱས། ཁྱེད་ག་ནས་བྱོན་དྲིས་པས། ངེད་རྡོ་རྗེ་གདན་ནས་ཁ་ཆེ་དང་པུ་རངས་ན་ཚུར་ལམ་ཕྱུང་ནས་འོངས་ཟེར། རྒྱ་གར་དུ་ཅི་ལ་བྱོན་དྲིས་པས། རྡོ་རྗེ་གདན་གྱི་དུས་མཆོད་ལ་ཕྱིན་ཟེར། འོ་ན་བྱ་ལོའི་འདས་མཆོད་ལ་གྲུབ་ཐོབ་མང་པོ་འོང་ཟེར་བ་ཁྱེད་དང་མཇལ་ལམ་ཞུས་པས། སྨྲས་པ། དེའི་དུས་ན་རྒྱ་གར་གྱི་ལྷོ་ཕྱོགས་ཀྱི་ཛཱ་ལནྡྷ་རའི་གྲོང་ཁྱེར་ན་རྒྱལ་པོ་ཟླ་བ་རྣམ་པར་གནོན་པས་ཧ་ཧཱ་སྒྲོག་པའི་དུར་ཁྲོད་དུ་ཚོགས་ཀྱི་འཁོར་ལོ་བསྐོར་ཏེ། གྲུབ་པ་ཐོབ་པ་དང་མངོན་པར་ཤེས་པ་དང་རྫུ་འཕྲུལ་ཅན་གྱི་རྣལ་འབྱོར་པ་རྣམས་ལ་གསོལ་བ་བཏབ་པས། རྒྱ་གར་གྱི་བཞི་བྱོན། བླ་མ་མི་དྲ་ཇོ་གི་ན་རེ། བོད་ཀྱི་གཉིས་དང་དྲུག་བྱུང་ཟེར། དེ་རྣམས་སུ་ཡིན་དྲིས་པས། ཨིནྡྲ་བོ་དྷི་དང་། ཛཱ་ལནྡྷ་ར་བ་དང་། ནག་པོ་སྤྱོད་པ་བ་དང་། ཤིང་ལོ་པ་དང་བཞི་རྒྱ་གར་བ་ཡིན། བོད་ཀྱི་གཉིས་ནི། དྷརྨ་ཀཱིརྟི་དང་། དྷརྨ་ཤཱི་ལའོ། །དེ་གཉིས་གང་ཡིན་དྲིས་པས། དྷརྨ་ཤཱི་ལ་ནི་ཆོས་ཀྱི་ཚུལ་ཁྲིམས་བྱ་བ་འཆི་མེད་གྲུབ་པའི་གདམས་ངག་ཡོད་པ། མངའ་རིས་སྟོད་ན་ལྷ་ཁང་གཅིག་མཛད་པ་ལ་བརྟེན་ནས་གཞན་དོན་མཛད། ཤྲཱི་དྷརྨ་ཀཱིརྟི་ནི་དཔལ་ཆོས་ཀྱི་གྲགས་པ་སྟེ། ལམ་རྩ་དང་རླུང་ལ་བརྟེན་ནས་ཕྱག་རྒྱ་ཆེན་པོ་ལམ་གཅིག་ཆོད་ཀྱི་གདམས་ངག་ཡོད་དེ། བོད་ཡུལ་གྱི་སྨད་ན་
1-2-59b
བཞུགས༑ མཚན་ཡོངས་སུ་གྲགས་པ་བླ་མ་དབུ་སེ་བྱ་བ་ཡིན་པ་འདྲ། ངེད་ཀྱང་དེར་འགྲོ། སྟོན་པས་སྨྲས་པ། བླ་མ་དབུ་སེ་དེ་སྙན་པ་ཆེ་བས་ང་ཡང་དེར་འགྲོ་བསམ་པ་ལ། སྐུ་ནས་བྱོན་ཏེ་གཤེགས་པའི་དུས་ཡིན་ཟེར་བས་ཆོས་མ་ཚར་གྱི་དོགས་ནས་ལུས་བྱས་པས། རྣལ་འབྱོར་པ་ཡིས་སྨྲས་པ། ཁྱེད་ཀྱིས་མདོ་མ་གཟིགས་སམ། གདུལ་བྱ་གང་ཞིག་གཅིག་ཙམ་གྱི། །དོན་དུ་ཐུབ་པ་བསྐལ་པར་བཞུགས། །དེ་ཡང་མྱུར་དུ་སྨིན་པར་མཛད། །དྲོད་གཤེར་ལྡན་པའི་མྱུ་གུ་བཞིན། །ཞེས་པས་གཞན་དོན་དུ་གསོལ་བ་བཏབ་ན་སངས་རྒྱས་རྣམས་བསྐལ་པར་ཡང་བཞུགས་པར་བཤད་པས། དད་གུས་དང་མ་བྲལ་བར་གྱིས་ལ་མྱུར་དུ་སོང་ཅིག །ཆོས་ཚར་ནས་འོང་གསུང་། དེར་དགའ་ནས་དེ་ལ་གདམས་ངག་ཞུས་པས། རྣལ་འབྱོར་པ་དེས་ཨ་ཙ་ར་གཅིག་གི་རྩ་ནས་གྲོ་ག་ལ་བྲིས་པའི་དཔེ་གཅིག་བསླངས་ནས་སྟོན་པ་ལ་སྟན་པ་ལ་བཤད། དཔེ་དེ་ཡང་བྱིན་ནས། འདི་རྣམ་བཞི་རྒྱུད་གྲོལ་བྱིན་རླབས་ནུས་འདོན་གྱི་གདམས་ངག་ཟབ་མོ་ཡིན་པས་མི་ལ་མ་བསྟན་པར་ཟུངས། ཕྱིས་ཀྱང་ང་དང་ཕྲད་ནས་འོང་གསུང་ནས་བཞུད། སྟོན་པས་བྲང་ཁང་དུ་ཕྱིན་ནས་ནང་པར་ཆོས་སྟོན་དྲང་སྙམ་ནས་བོས་ཙམ་ན། དཀོན་གཉེར་ན་རེ། ཁྱེད་སོང་པའི་རྗེས་ལ་རྣལ་འབྱོར་པ་ཀུན་ཡང་ཟེར། ཕྱོགས་ཐམས་ཅད་དུ་དྲིས་པས་མཐོང་བ་དང་ཐོས་པ་མ་བྱུང་། དེར་སྟོན་པ་
1-2-60a
༄༅། །ངེས་ཤེས་སྐྱེས་ནས་བླ་མའི་དྲུང་དུ་འགྲོ་ལྡོགས་བྱས་ནས། ཁྱི་ལོ་དབྱར་ཟླ་འབྲིང་པོ་ལ་སྟོད་ལུང་མཚུར་ཕུར་བྱོན་ནས། སྟོན་ཁར་སོང་ཙམ་ན་བླ་མས་གྲྭ་པ་ཀུན་ལ་སྔར་གྱི་ལོ་རྒྱུས་རྣམས་ཐོ་རེ་བ་བཤད་ནས་འདུག །དེར་གོང་གི་རྣལ་འབྱོར་པ་དེ་བཞི་འདིར་བྱོན་ནམ་སྙམ་པས། ཁྱེད་ཀྱི་དེ་སང་ནངས་པར་བྱས་པས་ཆོག་གསུངས་པས་ནུ་མ་སྤོབས། དེ་ནས་ཐེ་ཚོམ་མེད་པར་བྱ་སྙམ་ནས་ཁམས་པའི་དཔོན་གྲགས་སེང་གི་ཁང་པར་ཚོགས་ཀྱི་ཡོ་བྱད་བཤམས་ནས། རིན་པོ་ཆེ་དང་། བླ་མ་སྟག་དེའུ་བ་དང་། དགེ་བཤེས་དཀོན་མཆོག་སེང་གེ་དང་། བསྒོམ་པ་ཚུལ་ཁྲིམས་རྒྱལ་པོ་ལ་སོགས་པ་གྲྭ་པ་རྒན་པོ་བཅུ་ཙམ་བསོགས་ནས། ཚོགས་གྲལ་དུ་སྔར་གྱི་དེ་རྣམས་གསུང་པར་ཞུ་བྱས་པས། རིན་པོ་ཆེས་ལོ་རྒྱུས་དེ་རྣམས་ཞིབ་ཏུ་སྔར་བཞིན་དུ་གསུངས་པས་ཐམས་ཅད་ངོ་མཚར་དུ་གྱུར་ཏོ། །ཨ་ཙ་ར་གསུམ་པོ་གང་ཡིན་ཞུས་པས། ཨིནྡྲ་བོ་དྷི་བར་པ་དང་། ཤིང་ལོ་པ་དང་། ནག་པོ་སྤྱོད་པ་བ་གསུམ་ཡིན་ཏེ། ཁྱེད་ལ་ཆོས་བསྟན་པ་དེ་ང་ཡིན། གདམས་ངག་དེ་ངས་ཨིནྡྲ་བོ་དྷི་བ་ལ་ཞུས་པ་ཡིན། རྒྱ་གར་གྱི་ཚོགས་དཔོན་དེ་ནག་པོ་སྤྱོད་པ་བས་མཛད། ཁྱོད་ངའི་སྐྱེ་བ་བཞིའི་སློབ་མ་ཡིན་ཏེ། ད་རེས་དང་ལན་ལྔར་མཇལ། ཆོས་ཉན་བཤད་བྱེད་པ་ཡང་བཟང་པོ་ཡིན་ཏེ། ད་རེས་མ་ཕྲད་ན་བཤད་པ་ལ་འབྱམས་ནས་འགྲོ་བས་ཐེ་
1-2-60b
ཚོམ་གཅོད་ཅིང་བསྒོམ་ལ་བཞུགས་པའི་ཆེད་དུ་འོངས་པ་ཡིན་གསུང་། རེ་དགུ་པ་ནི། དགེ་བཤེས་སྟག་དེའུ་བས། དགེ་བཤེས་རྩང་སོ་བས་སྐྱེ་བ་བཞི་མཇལ་ལུགས་དྲིས་པས། སྔོན་རྒྱ་གར་ན་མགར་བ་རཏྣ་ཤཱི་ལར་སྐྱེས་པའི་ཚེ། ངས་སེམས་བསྐྱེད་པའི་སློབ་མ་ཡིན་ནོ། །བདུན་ཅུ་པ་ནི། དེའི་རྗེས་ལ་གླིང་འདིའི་བྱང་ཕྱོགས་འདི་པ་ནར་སྐྱེས་པའི་ཚེ། ངའི་མཁན་བུ་ཡིན་གསུང་། དོན་གཅིག་པ་ནི། དེ་ནས་ལུས་འཕགས་པོར་མེ་ཏོག་པ་ཤེས་རབ་བཟང་པོར་སྐྱེས་པའི་ཚེ་ཆོས་དྲུག་ཐུན་པྲཛྙཱའི་གདམས་ངག་བཤད། དོན་གཉིས་པ་ནི། སྐྱེ་བ་འདིའི་གོང་མར། རྒྱ་གར་ཐང་ཁོབ་རྒྱ་མཚོའི་འགྲམ་དུ་བྲམ་ཟེ་རྒྱལ་བ་ཤེས་རབ་ཏུ་སྐྱེས་པ་ལ་ངས་དབང་བཞི་རྫོགས་པར་བསྐུར། བསྟན་བཅོས་ལ་མཁས་པ་བསྒོམ་ལ་བག་ཆགས་བཞག་པས། ད་ལྟ་བསྒོམ་ལ་ངེས་ཤེས་སྐྱེ་སླ་བར་བྱུང་བ་ཡིན་གསུང་། དོན་གསུམ་པ་ནི། རིན་པོ་ཆེའི་ཞལ་ནས། མི་ཉག་གི་རྒྱལ་པོ་དེ་ཁ་ཅིག་གིས། དགེ་བཤེས་གླང་རི་ཐང་པའི་སྐྱེ་བར་འདོད་དེ། དེ་མ་ཡིན། རྣལ་འབྱོར་པ་མ་ཏང་ཀིའི་སྐྱེ་བ་ཡིན། རྒྱལ་པོར་སྐྱེ་བའི་དགོས་པ་ནི། ཡབ་རྒྱལ་པོ་ལ་ཕན་པ་དང་། རྒྱལ་ཁམས་དེའི་མི་རྣམས་བསོད་ནམས་ཀྱི་ལས་ལ་བཀོད་པ་དང་། རྒྱལ་པོ་བཙན་པས་བཙོན་མང་པོ་བཀྲོལ་བ་རྣམས་མ་འོངས་པ་ན་གདུལ་བྱར་གྱུར་པ་ཡིན་གསུང་། ཡང་དགེ་བཤེས་རྩང་པོ་བ་ལ་ཁྱོད་མེ་
1-2-61a
༄༅། །ཉག་གི་རྒྱལ་ཁམས་སུ་བཞུད་ལ་རི་བོ་ཧ་ལ་ཤན་ལ་བསྒོམས། སེམས་ཅན་མང་པོ་ལ་ཡང་ཕན་གསུང་། དོན་བཞི་པ་ནི། རིན་པོ་ཆེའི་ཞལ་ནས། ང་དབུས་སུ་འོངས་པ་ལ་རྒྱུ་མཚན་བཞི་ཡོད་དེ། སློབ་དཔོན་བསྒོམ་པའི་ཞལ་ནས། ཁམས་ནས་ཡར་བྱོན་གསུང་པ་དང་། སྒམ་པོར་གླེགས་བམ་བརྒྱ་འབུལ་སྙམ་པ་དང་། གཞུ་མཚུར་བར་འདིར་དགོན་པ་ཅིག་བྱ་སྙམ་པ་དང་། བླ་མ་ཞང་འཚལ་པ་བསྒོམ་ཆེན་པ་འཁྲུག་པ་མཛད་པ་རྣ་བ་མ་སྙན་ནས་ཤོལ་འདེབས་པའོ། །དེ་ལྟར་གསུངས་ནས་འཚལ་དུ་བྱོན་ནས་འཁྲུག་པ་བསྡུམས་པའི་དུས་སུ། རིན་པོ་ཆེ་ལ་བླ་མ་ཞང་འཚལ་པས་དག་སྣང་མང་པོ་གཟིགས། དགྱེས་ནས་ཕྱག་ལ་འཇུས་ནས་བྲོ་བརྡུངས། འཚལ་པ་སྐུ་མ་གཤེགས་བར་དུ་འཁྲུག་པ་ཡང་མ་མཛད་དོ། །དོན་ལྔ་པ་ནི། མཚུར་ཕུར་ནུབ་གཅིག་རྨི་ལམ་ན། མངའ་རིས་ནས་སུ་རིག་ཏུ་བྱོན་ཏེ་མཐའ་ཁོབ་འབུ་ཏ་ན་ཡར་ལ་བྱོན་པས། རྣལ་འབྱོར་པ་དཔོན་གཡོག་གཉིས་དང་ཕྲད་ནས་སུ་ཡིན་དྲིས་པས། ཨིནྡྲ་བོ་དྷི་ཡིན་ཟེར། གསོལ་བ་བཏབ་ནས་གདམས་ངག་ཞུ་བྱས་པས། རྗེ་བཙུན་མ་ཞལ་བཞི་ཕྱག་བཅུ་གཉིས་པའི་སྒྲུབ་ཐབས་ལས་ཁ་ཚར་དང་བཅས་པ་བསྟན་ནོ། །དོན་དྲུག་པ་ནི། མཚུར་ཕུར་ནུབ་གཅིག་གི་དུས་སུ་རྗེ་བཙུན་མ་དེ་ཡབ་དང་བཅས་པ་དཔའ་མོ་སུམ་བཅུ་སོ་དྲུག་གིས་བསྐོར་བ་ཞལ་གཟིགས་
1-2-61b
ནས༑ ལྷ་བཟོ་མགར་སྟོན་ཧོར་པོ་ལ་རས་རིས་དེ་འདྲ་བ་གཅིག་བྲིས་ནས། སྒྲུབ་ཐབས་དེ་གཞོན་ནུ་ལ་བྱིན་ནོ་གསུངས་ནས་གནང་ངོ་། །དོན་བདུན་པ་ནི། སྒྲུབ་ཐབས་དེའི་བྱིན་རླབས་མཛད་ཅིང་གཞན་ལ་གསུངས་པས་རྨི་ལམ་དུ་ནུབ་གཅིག་གི་དུས་ན། ཤིང་ལྗོན་པའི་གསེབ་ན་བུ་མོ་རྒྱན་ཅན་གསུམ་ན་རེ། ཆོས་ཟབ་མོ་གར་ཐོད་ཐོད་དུ་མ་བཤད་ཟེར། ནུབ་གཉིས་པ་དང་གསུམ་པ་ལ་མ་བཤད་བྱས་ཀྱང་མི་ཉན་ཟེར་ཏེ་ཁྲོས་ནས་བྱུང་། དེར་ལན་གཅིག་འཕྲོ་བཅད་དོ། །དོན་བརྒྱད་པ་ནི། མཚུར་ཕུར་རྨི་ལམ་ན། འཕགས་པ་འཇམ་དཔལ་གྱི་བཞུགས་གནས་རྒྱ་ནག་རི་བོ་རྩེ་ལྔའི་ཞོལ་ན། ཤིང་སྣ་ཚོགས་ཀྱི་ཚལ་ན་གཙུག་ལག་ཁང་མང་པོ་སྣང་བའི་སར་ཕྱིན་པས། བླ་མ་བཻ་རོ་དང་མཇལ་ནས་གདམས་ངག་དྲི་རྟོག་དང་བཀའ་སྩལ་མང་པོ་གསུང་། དོན་དགུ་པ་ནི། མཚུར་ཕུར་བསྒོམ་ཆེན་པ་འགས་བྱིན་རླབས་ཞུས་པའི་དུས་ན། སེང་ལྡེང་ནགས་ཀྱི་སྒྲོལ་མ་གཙོ་འཁོར་ལྔ་པ་ཞལ་གསལ་བར་གཟིགས་སོ། །བརྒྱད་ཅུ་པ་ནི། མཚུར་ཕུར་དགེ་བཤེས་གཅིག་གིས་དབུ་མཛད་ནས་བྱིན་རླབས་ཞུས་པས་མཆོད་བསྟོད་མཛད་པའི་དུས་སུ་སྔར་བས་མང་པར་མཛད། མཆོད་པ་ཐོན་ནས་དྲིས་པས། དཔལ་བདེ་མཆོག་ལྷ་དྲུག་བཅུ་རྩ་གཉིས་ཞལ་གཟིགས་ཏེ། ཁྱོད་ཀྱིས་མ་མཐོང་ངམ་གསུང་། དེ་ཅིའི་ཕྱིར་མཐོང་སྟེ། ཏིང་ངེ་འཛིན་གྱི་ཉམས་
1-2-62a
༄༅། །བཟང་པོ་ནི་སྐྱེས་སོ་བྱས། གྱ་གཅིག་པ་ནི། མཚུར་ཕུར་རྨི་ལམ་དུ་ཤར་ཕྱོགས་ཀྱི་འཇིག་རྟེན་གྱི་ཁམས་སུ་ཕྱིན་པས། ས་གཞི་རྣམས་མེ་ཏོག་དཀར་པོས་ཁེངས་པའི་འཇའ་ཚོན་གྱི་ནང་ན་ཇོ་བོ་ཐུགས་རྗེ་ཆེན་པོ་བཞུགས་པ་མཐོང་། སྨན་གྱི་རིལ་བུ་མང་པོ་བྱིན་ནས་འདི་ཀུན་གཞན་ལ་ཡང་བྱིན་དང་ཕན་པར་འགྱུར་རོ་གསུང་། གྱ་གཉིས་པ་ནི། མཚུར་ཕུར་དཔལ་བདེ་མཆོག་ཕྱག་གཉིས་ཡུམ་ཅན་ལྷ་ལྔ་ཞལ་གཟིགས། གྱ་གསུམ་པ་ནི། མཚུར་ཕུར་རྩང་པ་ཚུལ་སེང་གེས་དབང་བསྐུར་ཞུས་པས། དེའི་སྣང་བ་ལ་རིན་པོ་ཆེ་དགྱེས་པ་རྡོ་རྗེ་ཞལ་བརྒྱད་ཕྱག་བཅུ་དྲུག་པར་གྱུར་པའི་ཐུགས་ཀ་ནས་འོད་ཟེར་བྱུང་པས༑ གྲལ་ན་འདུག་པ་རྣམས་ལ་ཟུག་པའི་སྣང་བ་དབང་ཐོན་ནས་གཉིད་མ་ལོག་བར་དུ་ཡང་བྱུང་ངོ་། །ཡང་དགེ་བཤེས་ཡབ་པ་ཤེས་རིན་གྱིས་དབང་ཞུས་པའི་དུས་ན་རྡོ་རྗེ་རྣལ་འབྱོར་མ་དམར་མོ་གཅིག་ཏུ་མཐོང་ངོ་། །ཡང་མཚུར་ཕུར་ཁྱི་ལོའི་དབྱར་བླ་མ་ལྷ་རྗེའི་འདས་མཆོད་ཀྱི་ཉིན་པར་དགེ་འདུན་བརྒྱ་ཕྲག་གསུམ་ལ་སོགས་པའི་གྲལ་གྱི་གུང་ན་བཞུགས་དུས་སུ། དགེ་བཤེས་སུམ་པས་དགྱེས་རྡོར་ཞལ་བརྒྱད་ཕྱག་བཅུ་དྲུག་པ་ཡུམ་དང་བཅས་པའི་མཛུབ་མོ་ལ་སོགས་པ་ནས་འོད་ཟེར་མང་པོ་བྱུང་སྟེ། གྲྭ་པ་རྣམས་ཀྱི་ལ་འོད་ཟེར་གྱི་རྩེ་མོ་ཟུག་པར་ཉིན་ཕྲིལ་གྱིས་མཐོང་སྣང་བརྗོད་ན་བསམ་གྱིས་མི་ཁྱབ་བོ། །གྱ་བཞི་
1-2-62b
པ་ནི། མཚུར་ཕུར་སྔགས་ཀྱི་མཆོད་པ་གཅིག་མཛད་པའི་དུས་སུ་དེ་ཉིད་ཞལ་གཟིགས་སོ། །གྱ་ལྔ་པ་ནི། མཚུར་ཕུར་ཞལ་གཅིག་མའི་མཆོད་པ་མཛད་པའི་དུས་སུ་དེ་ཉིད་ཞལ་གཟིགས། གྱ་དྲུག་པ་ནི། མཚུར་ཕུར་དཔལ་གཤིན་རྗེ་གཤེད་ལྷ་བཅུ་གསུམ་ཐོད་པ་བཞི་དང་བཅས་པ་ཞལ་མཐོང་། ཐུགས་དམ་གྱི་ཐང་སྐུ་ཡང་བྲིས། གྱ་བདུན་པ་ནི། མཚུར་ཕུར་དྲེ་བོ་བསྒོམ་ཆེན་གཅིག་ན་བས། བླ་མ་ལ་གསོལ་བ་བཏབ་པས་བྱོན་ཏེ། ཞབས་དབང་མཛད་པ་ལ་ཕྱག་འཚལ་བར་བསམ་པ་ལ། དེ་མི་དགོས། ཁྱོད་ལ་ནད་ཀྱི་བར་ཆད་མི་འོང་གསུང་ནས་ཡལ་ཏེ་ཐལ། གཞན་དེ་ལྟ་བུ་ལ་ཟད་པ་མེད་དོ། །གྱ་བརྒྱད་པ་ནི། སྦྲུལ་ཟླ་ཉི་ཤུ་གསུམ་གྱི་ནུབ་མོའི་རྨི་ལམ་དུ་འོད་ཕུང་གཅིག་གི་ནང་དུ། རྣལ་འབྱོར་པ་ཕྱག་གཡས་པས་མདའ་འཛིན་ཅིང་། བྱ་བྱེད་ཀུན་གཡོན་པས་བྱེད་པ་གཅིག་གི་ཞལ་ནས། ང་ནི་སུ་ཡིན་མ་ཤེས་ན། །ང་ནི་ས་ར་ཧ་པར་གྲགས། །ཞེས་གསུང་། གདམས་ངག་གཅིག་ཞུ་བྱས་པས། མཐའ་བཞི་དང་བྲལ་ན་ལྟ་བ་ཡིན། །ཡེངས་པ་མེད་ན་བསྒོམ་པ་ཡིན། །དགག་སྒྲུབ་མེད་ན་སྤྱོད་པ་ཡིན། །སྤངས་ཐོབ་མེད་ན་འབྲས་བུ་ཡིན། །གསུངས་ནས་ཡལ་ལོ། །གྱ་དགུ་པ་ནི། མཚུར་ཕུར་ནུབ་གཅིག་གི་རྨི་ལམ་ན། ལྷོ་ནུབ་མཚམས་ན་ཕར་ལ་གཟིགས་པས། བར་སྣང་ན་ཚུར་ལ་འབྲུག་ཅིག་གྲག་པ་སྙམ་བྱེད་པའི་འོད་ཕུང་གི་
1-2-63a
༄༅། །ནང་ནས་རྣལ་འབྱོར་པ་ཕྱག་གཡས་ན་ཅང་ཏེའུ་ཐོགས་པ་གཅིག་ན་རེ། ང་མཻ་ཏྲི་པ་ཡིན་གསུང་། དེའི་ཞལ་ནས་འཁོར་འདས་ཀྱི་ཆོས་ཐམས་ཅད་གཉིས་སུ་འདུས་ཏེ། ཉོན་མོངས་པ་ཅན་གྱི་ཡིད་དང་༑ ལྷན་ཅིག་སྐྱེས་པའི་ཡིད་གཉིས་སུ་འདུས། ཉོན་མོངས་པ་ཅན་གྱི་ཡིད་ཀྱང་ལྷན་ཅིག་སྐྱེས་པའི་ཡིད་དུ་འདུས་གསུངས་ནས་ཡལ་ལོ། །དགུ་བཅུ་པ་ནི། ཟླ་བ་དེའི་ཉི་ཤུ་བདུན་གྱི་ནུབ་མོའི་རྨི་ལམ་ན། སྒམ་པོར་ཕྱིན་པ་ན། བླ་མ་ཉིད་ཀྱི་ཕྱག་ན་འཇའ་ཚོན་གྱི་སྣ་ཅིག་འདུག་པས་བསྡོག་ཅིང་ཕྱིན་པས་དགེ་འཕྲང་གི་ཡང་དགོན་དུ་སླེབ་ཙམ་ན་བླ་མ་ལྷ་རྗེ་དང་མཇལ་ནས་སྔར་གྱི་རྨི་ལམ་ཀུན་བཤད་པས། ཞལ་ནས། ཆོས་ཐམས་ཅད་རྨི་ལམ་དང་འཇའ་ཚོན་དུ་ཤེས་པར་གྱིས་གསུང་ཙམ་ན་ཡལ། གོ་གཅིག་པ་ནི། བླ་མ་སྟག་དེའུ་བས། ཁྱེད་ལ་སྤྲུལ་པ་མང་པོས་འགྲོ་དོན་མཛད་སྐད་པ། འཇིག་རྟེན་གྱི་ཁམས་ན་དེང་སང་ཇི་ཙམ་ཡོད་ཞུས་པས། སྤྱིར་ངེས་པ་མེད་ཀྱིས། འོན་ཀྱང་སྤྲུལ་པ་བཞི་ཡོད་པ་འདྲ། དེ་དག་ག་ན་བཞུགས་དྲིས་པས། བལ་བོད་ཀྱི་མཚམས་ཀྱི་ལམ་དེ་ན་བླ་མ་བཻ་རོའི་དགོན་པ་ཡོད་པ་དེ་ན་དགེ་བཤེས་ཆོས་ཀྱི་གྲགས་པ་བྱ་བ་ཆོས་བརྡའི་ཚུལ་དུ་གསུང་པ་གཅིག་ཡོད། གོ་གཉིས་པ་ནི། ཡང་མངའ་རིས་ཀྱི་ཕ་རོལ་ཁ་ཆེའི་ཚུར་རོལ་གྱི་སུ་རིག་བྱ་བ་ན། དགེ་སློང་དགེ་བའི་བློ་གྲོས་བྱ་བ་གཙུག་ལག་ཁང་
1-2-63b
མང་པོ་ཡང་བཞེངས། སྔར་གྱི་སློབ་མ་བཙུན་ཆུང་གཅིག་ཤི་བ་དེར་སྐྱེས་པ་དང་། སེམས་ཅན་འགའ་ཞིག་གི་དོན་མཛད་པར་བཞུགས། གོ་གསུམ་པ་ནི། རྒྱ་གར་ལྷོ་ཕྱོགས་ན་ཐུགས་རྗེ་ཆེན་པོ་ལ་གྲུབ་པ་ཐོབ་པའི་རྣལ་འབྱོར་པ་ངེས་མེད་དུ་བཞུགས་པ་ལ་གཅིག་ལ་ཐུགས་རྗེ་ཆེན་པོར་མཐོང་བ་དང་། ཡིན་ཟེར་བ་ཡང་ཡོད། གོ་བཞི་པ་ནི། ཤར་ཕྱོགས་ཀྱི་འཇིག་རྟེན་གྱི་ཁམས་གཅིག་ན་གྲུབ་ཐོབ་རྒྱལ་པོའི་ཆ་བྱད་ཅན་ཅིག་ཡོད་དེ། རྒྱལ་ཁམས་དེ་རྒྱལ་པོ་མིན་པས་མི་ཐུལ་བས་དེས་གཞན་དོན་མཛད་པ་ལགས་སོ། །གོ་ལྔ་པ་ནི། ནང་གཅིག་སྐུ་ཁམས་མ་བདེ་བས། མདང་གི་རྨི་ལམ་ན་ངའི་ལུས་འདི་ལ་བུད་མེད་དམར་མོ་གཅིག་འཐོན་ནས་བྲོས་པ་སྙམ་བྱེད་པས། དེ་ནི་འཆི་ལྟས་སུ་བཤད་སྙམ་ནས་ཐུགས་ཀ་ནས་གྲི་གུག་གཅིག་སྤྲོས་ནས་ཚུར་བཀུག་སྟེ་བླ་མ་ཁོ་རོ་བ་ལ་གྲོང་རྟགས་བཞི་ལས་གསུམ་ཚང་བ་ཚུན་ཆད་བཟློགས་པ་ཡིན་ཟེར། ང་ལ་ནི་ད་རེས་ཆ་མེད་གསུང་། གོ་དྲུག་པ་ནི། གླང་ལོའི་སྟག་ཟླའི་ཚེས་གཅིག་གི་ཉིན་པར་དགེ་བཤེས་རྩང་སོ་བ་དང་། དཔོན་འདུལ་དང་། དཔོན་གྲགས་སེང་དང་། གྲགས་རིན་དང་། དཀོན་མཆོག་རྒྱལ་མཚན་དང་། ན་བུན་པ་ལ་སོགས་པ་བགྲེས་པོ་ཉུང་ངེ་བ་ཅིག་བསོགས་ནས་ཞལ་ཆེམས་གསུངས་པ་ནི། ང་ལ་བདག་ཏུ་བཟུང་བ་ནི་ན་བཟའ་ལུས་གང་དང་། བཀའ་སྩལ་གྱི་ཕྱེ་འཐག་པའི་རང་
1-2-64a
༄༅། །ཐག་འདི་ལས་མེད། གཞན་ཡོ་བྱད་ཐམས་ཅད་དགེ་འདུན་རྣམས་དབང་སྟེ། གསེར་སྲང་ཉི་ཤུ་རྩ་ལྔ། དངུལ་དང་། གཡུ་དང་། དར་ཟབ། མཛོ་རྟ། ཐབ་ཆ་མང་པོ་ཡོད་པ་འདི་རྣམས་ཁྱེད་མི་ལྔས་བདག་པོ་བགྱིས་ལ། ནས་སུ་བསྒྲུབས་ལ་གྲྭ་པ་ལ་ཁྱེ། ངའི་ཤུལ་དུ་ལོ་གཅིག་གཉིས་སྡོད་ཅིག་གསུང་། དཔོན་གྲང་སེང་གིས། སྡོད་མཁན་ཅི་ཙམ་འོང་ངམ་ཞུས་པས། སྐུ་ཡར་བསྲངས། སྤྱན་ཧུར་གྱིས་མཛད་ནས། མ་ཐ་ཡང་ལོ་གཅིག་གཉིས་འོང་བ་མིན་ནམ་གསུང་། ཡང་གཞོན་ནུ་ཁྱོད་ལོ་གཅིག་གཉིས་འདིར་སྡོད་ལ་ངའི་ཐུགས་དམ་སྐུ་གསུང་ཐུགས་ཀྱི་རྟེན་འདི་རྣམས་ལ་ཡི་གེ་འབྲུ་གཅིག་ཀྱང་མ་འཐོར་བར་གྱིས་ཅིག །ངས་ཀྱང་ཆོས་སྐྱོང་ལ་བཀའ་བསྒོ་ཞིང་གཏད་པ་ཡིན་གསུང་། གོ་བདུན་པ་ནི། དེའི་གོང་ནས་ཟླ་བ་གསུམ་དུ་ནམ་མཁའ་ལ་འཇའ་ཚོན་དང་ས་གཡོ་བ་དང་འུར་ཐུག་གི་སྒྲ་ལ་སོགས་པ་ལྟས་ཆེན་པོ་རྒྱུན་མ་ཆད་པ་བྱུང་། ཁྱད་པར་དུ་ཚེས་གཉིས་ནས་གསུམ་དུ་འགྲོ་བའི་ནུབ་མོ་ས་གཡོས་བར་མ་ཆད་པ་དང་། ཡང་དགོན་གྱི་སྟེང་དུ་འཇའ་ཚོན་གྱི་གདུགས་འཁྲིགས་པ་དང་། མཁའ་འགྲོ་མ་མང་པོ་འཚོགས་པ་དང་། ཌཱ་མ་རུའི་སྒྲ་གྲགས་པ་ལ་སོགས་པ་བྱུང་། ཚེས་གསུམ་གྱི་དྲོ་ཐོན་པའི་རྗེས་ལ་གྲྭ་པ་རྣམས་ལ་ཞལ་བསྟན་ནས་ད་ཕྱིར་ལ་བཞུད་ཅིག་གསུང་། དེ་ནས་སྐུ་དྲང་པོར་བསྲངས། སྐྱིལ་དཀྲུངས་
1-2-64b
མཛད་ནས་སྤྱན་ནམ་མཁའ་ལ་ཡུན་རིང་པོ་གཟིགས་ནས། སླར་དབུ་ན་བཟས་གཏུམས་ནས་ཐུགས་དམ་ལ་བཞུགས་པ་དང་། ཚེས་གསུམ་གྱི་དགོངས་མོ་ཉི་མ་ཟླ་བ་དང་འགྲོགས་ནས་འཇིག་རྟེན་གྱི་ཁམས་གཞན་དག་ཏུ་འགྲོ་དོན་ལ་གཤེགས་སོ། །གོ་བརྒྱད་པ་ནི། དེ་ནས་ཚེས་བཅུ་ལ་གདུང་བཞུ་བས། དེར་འཚོགས་པ་རྣམས་ཀྱི་སྣང་བ་ལ། ཉི་མ་སྔར་བས་རིང་བ་དང་། འོད་ཟེར་རྨ་བྱའི་གདུགས་ལྟ་བུར་མཐོང་བ་དང་། དཔའ་བོ་དང་རྣལ་འབྱོར་མ་རུས་པའི་རྒྱན་ཅན་མང་པོ་དང་། མེ་ཏོག་གི་ཆར་དང་། པུར་གྱི་སྟེང་ན་འཇའི་གདུགས་བརྩེགས་པ་དང་། དུད་པ་འཇའ་ཚོན་དུ་གྱུར་པའི་ནང་ན་བླ་མ་བཞུགས་པ་དང་། དུད་པ་ལ་བྱ་རྣམས་བསྐོར་བ་བྱེད་པ་དང་། མེ་སྒྲ་ལ་སྒྲ་སྙན་པ་མང་པོ་གྲགས་པ་དང་། རི་དྭགས་རྣམས་འདུས་ཤིང་གུས་པ་བྱེད་པ་ལ་སོགས་པ་མཐོང་སྣང་མང་པོ་བྱུང་། དགེ་སྦྱོར་མེད་པ་ལ་སྐྱེས་པ་དང་། ཡོད་པ་ལ་བོགས་ཐོན་པ་དང་། དེ་ནས་སྟོང་ཉིད་སྙིང་རྗེ་དབྱེར་མེད་པས་ཐུགས་དང་། ཐེག་པ་སྣ་ཚོགས་ཀྱི་ཆོས་སྟོན་པའི་ལྗགས་དང་། བྱང་ཆུབ་སེམས་ཀྱི་རིང་བསྲེལ་དང་། བསྐྱེད་རིམ་བརྟན་པས་ལྷ་སྐུ་དང་གཞན་དོན་དུ་མང་པོ་བྱོན་ནོ། །གོ་དགུ་པ་ནི། དེ་ལྟར་ལོ་གསར་ལ་སྐུ་གཤེགས་པས་དེའི་དགུན་གྲྭ་པ་ཕལ་ཆེར་གྱེས་ནས། དཔྱིད་ཀ་ཤུལ་ན་བཞུགས་པའི་དགེ་བཤེས་རྩང་པ་དང་། ཤེར་འབྱུང་དང་། 
1-2-65a
༄༅། །དཀོན་མཆོག་སེང་གེ་དང་། དཔོན་རིན་ཆེན་སེང་གེ་དང་། ཕྱག་དཔོན་དང་། གྲགས་སེང་ལ་སོགས་པའི་མི་ཆེན་གདན་སར་བསྐོས་པ་དེ་རྣམས་གྲོས་བྱས་ཏེ། མཚུར་ཕུ་འདི་བསྒྲོད་པ་དང་ཟིན་པ་དཀའ་ལ། གནས་གཞི་ཅ་ར་ནི་ཡུལ་གྱི་སྙིང་པོ། སའི་མདུད་པ། གདན་ས་བྱེད་པའི་འོས་སུ་འདུག་པར་འཆམ་མོ། །དེར་བསྒོམ་དར་ལ་གཉེར་པ་ཞུས་ནས་ཅ་རར་འཚོགས་ཏེ། གདུང་རྟེན་མཁན་པོ་རྟ་འུ་རིན་ཆེན་སྒང་ནས་བོས། ས་འབུམ་མཁན་པོ་དགེ་བཤེས་ཉ་ལེ་བོས་ནས་བཟོ་ཐམས་ཅད་ལག་ལེན་དུ་བྱས། དགེ་བཤེས་གཡོར་པོས་མཆོད་ཁར་དབུ་རྩེའི་རྨང་འདིངས་པའི་དཔོན་མཛད་དོ། །དེའི་ཚེ། སློབ་དཔོན་ཤེར་རིན་གྱི་ཞལ་ནས། འོ་ཁྱེད་གཉིས་ཉོན་ཅིག ཕུའི་དགོན་པ་འདི་ནི་རིན་པོ་ཆས་སྐམ་པོ་གནས་ནང་ནས་འདིར་ཐུགས་དགོངས་བཏང་ནས་བྱོན། ཚོགས་པ་བསྡུས། ཞལ་ཆེམས་སུ་ཕོག །སྐུ་ཡང་འདིར་གཤེགས། གདུང་ཡང་འདིར་བཞུ། ཐུགས་དམ་མང་པོ་ཞལ་གཟིགས་ཤིང་དབང་དང་རབ་གནས་མང་པོ་མཛད་པས། ས་གཞི་བྱིན་གྱིས་བརླབས་པ་འདི་བཞག་ནས་གར་འགྲོ་གསུང་ནས་དཔོན་སློབ་གསུམ་གྱིས་དམ་བཅས་ནས། རིན་པོ་ཆེའི་སྐུ་ཚབ་ཀྱི་སྐུ་གདུང་བཞུ་བ་སྤྱན་དྲངས་པའི་འོ་མ་དང་དྲི་བཟང་པོ་ལ་སོགས་པ་ལ་བྱས་ཏེ། ནང་དུ་སངས་རྒྱས་ཀྱི་རིང་བསྲེལ་དང་། བཀའ་རྒྱུད་གོང་མ་རྣམས་ཀྱི་
1-2-65b
གདུང་དང་། རིན་པོ་ཆེའི་གདུང་རིང་བསྲེལ་དབུ་སྐྲ་ཕྱག་ཞབས་ཀྱི་སེན་མོ་དང་ན་བཟའ་རྣམས་བཞུགས་ཏེ། ཚར་བ་དང་། མོས་གུས་ཀྱི་རྟེན་དུ་སྔར་གྱི་གཟིམས་སྐྱོར་དེར་བཞུགས་སོ། །ཡང་གདུང་ཐལ་ལ་སོགས་པ་འོ་མི་རྒྱལ་བའི་ཆེད་དུ་རྟེན་བཞེངས་འདོད་པས། དཔོན་སློབ་གཉིས་གྲོས་བྱས་ཏེ། འབུམ་པའི་ལུགས་ནི་གཞན་ན་ཤིན་ཏུ་མང་སྟེ་ངོ་མཚར་མི་ཆེའོ། །འོ་ན་གང་ཆེ་ན། སའི་མཆོད་རྟེན་དཔལ་ལྡན་འབྲས་སྤུངས་འདྲ་བ་གཅིག་བཞེངས་དགོས་པ་ནི། སྤྱིར་འཛམ་བུ་གླིང་ན་ངོ་མཚར་ཆེ་བ་སྐུ་གསུང་ཐུགས་ཀྱི་རྟེན་ནི། རྒྱ་གར་ལྷོ་ཕྱོགས་ན་ཆོས་སྐུའི་རྟེན་དཔལ་ལྡན་འབྲས་སྤུངས་རེག་པ་མེད་པའི་གདུགས་ཅན༑ ལྷ་ཆེན་པོ་བཞིས་ཡོན་བདག་བྱས་པ། ལྷ་བཟོ་བི་ཤྭ་ཀར་མས་བྱས་པ་དང་། ཕྱིའི་རྒྱ་མཚོ་ན་ལོངས་སྐུའི་རྟེན་དཔལ་རྣམ་པར་སྣང་མཛད་གངས་ཆེན་མཚོ་རིན་པོ་ཆེ་རྣམ་པ་ལྔ་ལས་བྱས་པའི་སྤྱི་བོ་ན་ཆུ་ཤེལ་ཡོད་པ་ཆེན་པོ་གཅིག་ར་ཧུ་ལས་ཡོན་བདག་བྱས་ཏེ་བི་ཤྭ་ཀར་མས་བཟོ་བྱས་པ་དང་། རྡོ་རྗེ་གདན་ན་སྤྲུལ་པའི་སྐུའི་རྟེན་བྱང་ཆུབ་ཆེན་པོ་ཙན་དན་གོར་ཤི་ཤའི་དྷེ་གུ་ལས་བྱས་པའི་སངས་རྒྱས་ཀྱི་དགུང་ལོ་སུམ་བཅུ་སོ་བརྒྱད་དང་མཉམ་པའི་སྤྱན་རིན་པོ་ཆེས་བྱས་པ་དེ་བྲམ་ཟེ་སྤུན་གསུམ་གྱི་ཐ་ཆུང་གིས་ཡོན་བདག་བྱས། བཟོ་བོ་བི་ཤྭ་ཀར་མས་བྱས་པ་ཡོད་དོ། །དུས་ཕྱིས་མཆོད་རྟེན་འབྲས་སྤུངས་ཀྱི་དྲུང་ན། 
1-2-66a
༄༅། །པཎྜི་ཏ་ཉི་མའི་སྙིང་པོ་བྱ་བ་བཞུགས་པས། རྒྱ་གར་ཤར་ཕྱོགས་ནས་ལྷ་བཟོ་བོས་ནས། དེའི་གཟུགས་ཇི་ལྟ་བ་ལ་བུམ་པ་ལ་ལྷ་ཁང་ལྟར་ཡོད་པ་དང་། དེའི་མཐའ་མར་སློབ་དཔོན་ཀླུ་སྒྲུབ་ཀྱིས་རྡོ་རྗེའི་ལྕགས་རི་ལ་སྒོ་བཞི་བཏོད་ནས་ལྷ་ཆེན་པོ་བཞི་དང་བཅས་པ་དང་། དེའི་མཐའ་མ་ན་སློབ་དཔོན་ཀླུ་སྒྲུབ་ཀྱི་རྣམ་ཐར་བཀོད་ནས་ཡོད་པ་རྣམས་ཇི་ལྟ་བར་ཐང་ཀ་ཆེན་པོ་གཅིག་ལ་བྲིས་ནས། བོད་དུ་པཎྜི་ཏ་དེས་ཁྱེར་ནས་འོངས་པས། དེའི་སློབ་མ་སྟོན་པ་གཉིས་གནང་ནས་ད་ལྟ་དགེ་བཤེས་གླན་གྱིས་བཞེངས་པའི་གཙུག་ལག་ཁང་ན་བཞུགས་ཟེར་བ་ཐོས་ནས། དགེ་བཤེས་རྣམ་འབར་བའི་དབོན་སྟོན་ལྷ་སར་མཆོད་པ་ལ་འགྲོ་བ་དང་འགྲོགས་ནས་ཐང་ཀ་དེ་ལས་དཔེ་བླངས། ལྷ་ས་ཐང་མགོ་ནས་རྒྱ་གར་དུ་ལན་གཉིས་བྱོན་པའི་རྣམ་འབར་བའི་སློབ་མ་བལ་པོ་ལོ་ཙཱ་བ་ལ་དཀར་ཞལ་དང་མཆོད་རྟེན་གྱི་ཚད་བསླབས་ནས་འོངས་སོ། །སྔར་རིན་པོ་ཆེའི་ཞལ་ནས། ཡང་དགོན་གྱི་རྒྱབ་འདིར་འབྲས་སྤུངས་ཀྱི་མཆོད་རྟེན་གཅིག་བཞེངས་ལ་བསྐོར་བ་བྱའོ་གསུང་པའི་ལུང་ཡོད་པས། དེར་གདུང་བཞུ་སར་མཆོད་རྟེན་བྱ་བ་རིམ་པ་ལྔ་ལ་བརྟེན་ནས་ས་ཆོག་ལ་སོགས་པ་བྱས་པས། དེའི་ཉིན་པར་ཁ་བ་ཆེན་པོ་བབ་སྟེ། འཇའ་ཚོན་གདུགས་འདྲ་བས་ནམ་མཁའ་ཁེངས་པ་དེའི་ཉིན་མོ་ནས་མཆོད་རྟེན་མ་ཚར་བར་དུ་བྱུང་། དེར་
1-2-66b
དགེ་བ་ལ་བར་དུ་གཅོད་པའི་མི་དང་མི་མ་ཡིན་པ་རྣམས་ལ་བྱང་ཆུབ་ཀྱི་སེམས་བསྒོམས། ཚིག་གི་མཚོན་བརྡེག་པ་ལ་བཟོད་པའི་གོ་གོན། སངས་རྒྱས་ཐམས་ཅད་ཀྱི་ངོ་བོ་བླ་མ་རིན་པོ་ཆེའི་ཐུགས་དགོངས་ཡོངས་སུ་རྫོགས་པར་བྱ་བའི་ཕྱིར་སེམས་བསྐྱེད་ནས། སློབ་དཔོན་ཤེས་རིན་གྱིས་ཚད་ཤིང་བཟུང་། ཁོ་བོས་རྩིག་བཟོ་བྱས་པས་ཞག་བཅུ་ན་བྲེ་མན་ཆད་ཟིན། རྒྱལ་བ་རྡོ་རྗེ་གྲགས་བོས་ནས་ཞ་ལ་བྱས་པས་ཟླ་བ་ཕྱེད་ན་ལེགས་པར་ཚར་ཏེ། ལུགས་སུ་བླུག་ཅིང་འབུར་དུ་བཏོད་པ་ལྟར་ཞག་ཉི་ཤུ་རྩ་ལྔ་ན་ཟིན་པས། གང་གིས་མཐོང་པ་ཐམས་ཅད་ཤིན་ཏུ་ལེགས་སོ་ཞེས་ཟེར། དེའི་ནང་དུ་སངས་རྒྱས་ཀྱི་རིང་བསྲེལ་དང་༑ དེ་བཞིན་གཤེགས་པ་གླང་པོའི་གདུང་དང་། བྱང་ཆུབ་ཤིང་གི་ལོ་མ་དང་། འབྲས་བུ་དང་། གནས་ཆེན་པོ་བརྒྱད་ཀྱི་ས་དང་། ལི་ཡུལ་ནས་བྱོན་པའི་དཔལ་ཁ་སར་པ་ཎིའི་སྐུ་ཁྲུ་གང་པ་གཅིག་གིས་སྣ་དྲངས་པའི་ལུགས་མ་བཅུ་གཅིག་དང་། གླེགས་བམ་གསུམ་ལ་སོགས་པ་གསུང་གི་རྟེན་མང་པོ་དང་། རིན་པོ་ཆེའི་དབུ་སྐྲ་གདུང་རིང་བསྲེལ་ཕྱག་ཞབས་ཀྱི་སེན་མོ་དང་། ན་བཟའ་བཞུགས་གདན་ཞབས་རྗེན་དང་༑ བཀའ་རྒྱུད་གོང་མ་རྣམས་ཀྱི་གདུང་དང་དབུ་སྐྲ་ལ་སོགས་པ་དཔག་ཏུ་མེད་པ་མང་པོ་བཞུགས་སོ། །སྟེང་དུ་རྡོ་རྗེའི་འཁོར་ལོ་རིམ་པ་བཅུ་གསུམ་པ་དང་། མགར་བ་མཁས་པ་ཁྲོ་ཆེན་གྱིས་བཟོ་བྱས་
1-2-67a
༄༅། །པའི་ཟངས་ཀྱིས་ཆར་ཁབས་བྱས། སློབ་མ་དད་པ་ཅན་མུ་ཙ་ཨག་ཙོམས་ཀྱིས་བལ་ཡུལ་དུ་ཕྱིན་ནས་གསེར་གྱི་འགན་ཇི་ར་བཟང་པོ་བླངས་ནས་དེ་ལ་བཙུགས་པས་བུམ་པ་ལ་རིན་པོ་ཆེའི་སྐུ་མཛུབ་གང་པ་ཙམ་གཅིག་ཐག་ཉེ་རིང་རན་པར་ནས་འོད་ཀྱི་རྣམ་པར་མཐོང་བ་ལྷ་བཟོ་བ་དྲིས་པ་ལྟ་བུ་ཡང་བྱུང་པས་ཐམས་ཅད་ངོ་མཚར་དུ་གྱུར་ཏོ། །དེ་ལྟ་བུའི་རྟེན་བཟོ་གནས་དང་བྱིན་རླབས་སུ་ལྡན་པ་དེས༑ བུ་སློབ་མོས་གུས་ཅན་རྣམས་ཀྱིས་ཚོགས་གསོག་པའི་རྟེན་དུ་གྱུར་ཏེ། དེ་ལ་བརྟེན་ནས་རིན་པོ་ཆེའི་ཐུགས་ལྗགས་བཞུགས་པའི་གདུང་ཁང་ཡང་བསྒོམ་ཆེན་རས་པས་གཞི་མཛད་ནས་བཞུགས། གདན་ས་ལ་ཞེན་པ་ཆེ་ཞིང་སེམས་རྩེ་གཅིག་པར་བརྟན་པའི་དགེ་སློང་རོང་པ་ཁུ་མཚན་ལ་སོགས་པ་དང་། བསྒོམ་པ་རས་པ་ལ་སོགས་པའི་ཐུགས་རྩེ་གཅིག་པར་བསམ་གཏན་ལ་མཉམ་པར་འཇོག་ཅིང་བསྒྲུབ་པ་གཙོ་བོར་མཛད་པའི་བསྒོམ་ཆེན་སེང་གེ་ལྟ་བུ་རྣམས་འཚོགས་ནས་མོས་གུས་མཛད་ཅིང་བཞུགས་སོ། །དེ་བཞེངས་ནས་ལོ་ཉི་ཤུ་རྩ་གཅིག་ན་སེམས་ཅན་རྣམས་ཀྱི་དཔལ་ལམ། མགོན་དུ་གྱུར་པ་མེ་ཉག་ན་བཞུགས་པའི་བླ་མ་རྩང་པོ་བས། རྡོ་རྗེ་གདན་ལྟ་བུའི་གདན་ས་འདིར། སྐུ་གསུང་ཐུགས་ཀྱི་རྟེན་དང་། རིན་པོ་ཆེ་སྣ་ལྔ་དང་དར་ཟབ་ལ་སོགས་པ་ཡོ་བྱད་བསམ་གྱིས་མི་ཁྱབ་པ་ཡང་ཡང་བསྙེན་བཀུར་
1-2-67b
མཛད་ནས། ཁྱད་པར་དུ་དཔལ་ལྡན་འབྲས་སྤུངས་ལ་གསེར་གྱི་ན་བཟའ་བཟང་པོ་དང་། དེའི་ཆས་རྐྱེན་དང་། བཟོ་བོ་རྣམས་མི་ཉག་འགའ་ནས་བརྫངས་ཏེ། དེ་དག་གི་ཐུགས་དགོངས་རྫོགས་པར་བྱེད་པ་ལ་དགེ་བཤེས་ཤན་ཤི་སྟོན་ཤེ་དང་། བསྒོམ་པ་རྡོ་རྗེ་བྱང་ཆུབ་ཀྱིས་ཡོན་བདག་བྱས། བསྒོམ་པ་དཀོན་ཚུལ་གྱིས་བསམ་པ་བཟང་པོའི་སྒོ་ནས་གཉེར་པ་མཛད་དེ། སྤྱིར་ཡང་བཟོ་གནས་མང་དུ་ཤེས་ཤིང་། ཁྱད་པར་དུ་མཆོད་རྟེན་འདི་བཞེངས་པ་ལ་མཁས་པའི་རིན་པོ་ཆེའི་སྤྱན་སྔ་གཞོན་ནུའི་མིང་ཅན་གྱིས་བཟོ་བྱས་ཏེ་མཆོད་རྟེན་ལེགས་པར་བཅོས་ནས། མ་ཞར་འོངས་པའི་བཟོ་བོས་ཀྱང་གསེར་གྱི་ན་བཟའ་གསོལ༑ གདན་ས་ན་བཞུགས་པའི་བགྲེས་གཞོན་ཐམས་ཅད་ཀྱིས་དད་པ་དང་བརྩོན་འགྲུས་ཀྱིས་བསྐུལ་ཏེ། ཕྱི་མཆོད་རྟེན་ལ་ནང་གཞལ་ཡས་ཁང་དུ་ཡོད་པ་སྒོ་བཞི་ལན་ཀན་དང་བཅས་པ་བང་རིམ་རྒྱལ་པོའི་ཁང་པ་དང་བཅས་པ། རྒྱར་འདོམ་གང་པ། ཆུ་ཞེང་གབ་པའི་བཟོ་དང་རྩིག་པ་ཚར་ནས། ཞལ་ལའི་བཟོ་གནས་ལ་མཁས་པ། གཞོན་ནུ་ཤེས་རབ་ཅན་སྡེ་ཆེན་སོལ་ནག་ཐང་པོ་ཆེ་ནས་བོས་ཏེ་བཟོ་ལེགས་པའི་དཔེར་གྱུར་པ། རྒྱུ་དངུལ་ལས་བྱས་ཏེ་ཁ་དོག་ཀྱང་དེར་སྣང་བ་ལོ་གཉིས་ན་ཚར་རོ། །དེའི་སྟེང་དུ་འབྱུང་བ་ཆར་གྱི་གཉེན་པོར་མཐིང་གི་གྱོ་མོ་མཁས་པ་ཚུལ་སྐྱབས་ཀྱིས་བགྱིས་ནས་མཆོད་རྟེན་
1-2-68a
།ཆེན་པོ་དེའི་རྒྱན་དུ་བཀབ། དེའི་རྩེ་མོར་གཅུང་པ་ཇོ་སྲས་ཀྱིས་གསེར་གྱི་འགན་འཇི་ར་བལ་པོའི་བཟོ་བོ་ལ་ནོར་རྫས་མང་པོ་བརྫངས་ནས་ཤུལ་རིང་པ་ནས་སྤྱན་དྲངས་ཏེ། མཆོད་རྟེན་གྱི་དབུ་ལ་བཙུགས་པས་དགོན་གནས་འོད་དང་ལྡན་པར་བྱས་སོ། །དེར་གཞན་ཡང་མཁས་པའི་སྐྱེ་བོ་གང་གིས་གཟིགས་པ་དང་། སྐྱེ་བོ་ཐ་མལ་པ་རྣམས་ཀྱིས་བཟོ་འདི་དག་ལེགས་སོ་ཞེས་ཉི་འོག་གི་རྒྱལ་ཁམས་ཐམས་ཅད་སྙན་པའི་བ་དན་གྱིས་ཁྱབ་བོ། །ཡ་ཀི་བལ་པོ་རྡོ་འབིགས་པ་ནས། མི་ཉག་འགའ་ཡན་ཆད་དུ་མཆོད་རྟེན་བཞེངས་པ་རྣམས་ཀྱིས་དཔེ་ལེན་པའི་གནས་སུ་གྱུར་ཏེ། སངས་རྒྱས་ཀྱི་བསྟན་པ་ཇི་ལྟར་གནས་ཀྱི་བར་དུ་ཕྱོགས་དང་ཕྱོགས་མཚམས་ཐམས་ཅད་ཀྱི་བུ་སློབ་ཡོན་བདག་དང་བཅས་པ་རྣམས་ཀྱིས་བསྙེན་བཀུར་ཞིང་མཆོད་ནས། གསོལ་བ་བཏབ་ན་གནས་སྐབས་མཐར་ཐུག་ཐམས་ཅད་དུ་ཇི་ལྟར་བསམས་པའི་དོན་རྣམས་འགྲུབ་ཅིང་དགོས་འདོད་ཕུན་སུམ་ཚོགས་པ་འབྱུང་བའི་ཡིད་བཞིན་གྱི་ནོར་བུ་རིན་པོ་ཆེ་ལྟ་བུའི་མཆོད་སྡོང་ཆེན་པོར་གྱུར་ཏོ། །བརྒྱ་ཐམ་པ་ནི། ཡང་རིན་པོ་ཆེ་ལ་ཞུས་པ། སྐྱེ་བ་འདིའི་ཕྱི་མ་ལ་གཞན་དོན་གང་དུ་མཛད་ཞུས་པས། རིན་པོ་ཆེའི་ཞལ་ནས། རྒྱ་གར་གྱི་ཡུལ་ནུབ་ཕྱོགས་ཨཽ་རྒྱན་གྱི་བྱང་ཤར་མཚམས་ན་ཀཱརྟི་ཀ་བྱ་བའི་ཡུལ་ཡོད། དེ་ན་རྣལ་འབྱོར་པ་གཅིག་ཏུ་སྐྱེ་བ་བཞེས་
1-2-68b
ནས་སེམས་ཅན་ལ་ཕན་འདོགས། དྷརྨ་སིདྡྷི་བྱ་བར་འགྱུར། བླ་མ་སྒམ་པོ་པ་དང་མཇལ་གསུང་ངོ་། །བརྒྱ་དང་གཅིག་པ་ནི། དེའི་རྟིང་ལ་བོད་ཡུལ་གྱི་དབུས་ལྷོ་བྲག་གྲུབ་པའི་གནས་བདུན་དུ་སྐྱེ་བ་ཡིན། དེ་ན་སློབ་མ་གཅིག་སྐྱེས་པའི་དོན་དང་གཞན་ལ་ཕན་པར་འགྱུར། ཡུན་རིང་པོ་ནི་དེར་མི་སྡོད་གསུང་ངོ་། །བརྒྱ་དང་གཉིས་པ་ནི། རྒྱ་གར་གྱི་ལྷོ་ཕྱོགས་མུ་རུ་པ་བྱ་བ་ན་མཁའ་འགྲོ་མའི་གནས་ཀོངྐ་བྱ་བ་ཡོད་པ། ཕྱོགས་དེ་ན་པོ་ཏ་ལའི་གྲོང་ཁྱེར་བྱ་བ་ཡོད་པ་ན། ཡོན་བདག་དགོན་པ་བ་རྒྱལ་པོ་གཅིག་ཏུ་སྐྱེས་པ་ཡིན་ཏེ། ལོག་པའི་སེམས་ཅན་མང་པོ་ལ་ཕན་ཐོགས་པ་ཡིན་གསུང་། བརྒྱ་དང་གསུམ་པ་ནི། བླ་མ་རིན་པོ་ཆེ་མཚུར་ཕུ་ན་བཞུགས་པའི་དུས་ན། སློབ་དཔོན་དཀོན་མཆོག་སེང་གེས་དབུ་མཛད་པའི་བསྒོམ་ཆེན་བགྲེས་པོ་བཞི་བཅུ་ཙམ་གྱིས་མཆོད་པ་གཅིག་བཤམས་ནས། ཆོས་རྗེ་ལ་ཞུས་པ། ལགས། མ་འོངས་པའི་དུས་ན་ཆོས་རྗེ་མངོན་པར་རྫོགས་པར་སངས་རྒྱས་པའི་དུས་ན་འཁོར་འདུས་པ་དང་པོ་ནི་གང་དང་གང་ལགས་ཞུས་པས། ཆོས་རྗེའི་ཞལ་ནས། མ་འོངས་པའི་དུས་ན་འཁོར་འདུས་པ་དང་པོ་ནི་བཞི་སྟེ་རྒྱ་གར་ལྷོ་ཕྱོགས་ན་ལོ་ཀི་ཤྭ་ར་བི་ར་ཧ་རིའི་གཙུག་ལག་ཁང་ན། རྣལ་འབྱོར་པ་མི་ཏྲ་ཛོ་གི་བྱ་བ་བཞུགས་སོ། །གཅིག་དེ་ཡིན་གསུང་། ཡང་མངའ་རིས་ཀྱི་སྟོད་ན་སེམས་ཅན་གྱི་དོན་མང་པོ་མཛད་པའི་དགེ་བའི་
1-2-69a
༄༅། །བློ་གྲོས་བྱ་བ་བཞུགས། གཅིག་དེ་ཡིན་གསུང་། ཡང་མི་ཉག་ཆོས་ཀྱི་རྒྱལ་པོའི་བླ་མ་ཡར་ལུངས་པ་རྒྱ་བེ་བུམ་རི་མོ་ཡང་ཟེར། རྒྱ་བྱང་ཆུབ་སེམས་དཔར་གྲགས་པ་དེ་ཡིན། གཅིག་ནི་དགེ་བའི་བཤེས་གཉེན་དཀོན་མཆོག་སེང་གེ་ཁྱེད་རང་ཡིན་གསུང་། གཞན་ཡང་ངོ་མཚར་ཅན་གྱི་ལོ་རྒྱུས་མང་དུ་གསུངས་སོ། །བླ་མ་རིན་པོ་ཆེའི་ཞལ་ནས། སངས་རྒྱས་ཀྱི་མཚན་ནི་མི་གསུང་། བླ་མ་འཚལ་པའི་ཞལ་ནས༑ དཔལ་མཚུར་ཕུ་བ་ཆེན་པོ། བྱམས་པའི་རྟང་ལ་བྱོན་པའི་སངས་རྒྱས་སེང་གེ་སྒྲ་ཡིན་པའི་ལུང་བསྟན་ཡང་མང་དུ་གསུང་སྐད། བརྒྱ་དང་བཞི་པ་ནི། སློབ་དཔོན་ཤེས་རབ་ཀྱི་བྱང་ཆུབ་རི་བོ་བྱ་རྐང་ཅན་ན་བཞུགས། འགྲོ་བ་མང་པོ་ལ་ཡང་ཕན་གསུང་། བརྒྱ་དང་ལྔ་པ་ནི། སློབ་དཔོན་བསྒོམ་པ་དེ་རྒྱ་གར་ལྷོ་ཕྱོགས་ན་ཡུལ་ཀོངྐ་བྱ་བ་ན་སྐུ་འཁྲུངས། མུ་སྟེགས་ཀྱི་རྒྱལ་པོ་བཏུལ་ནས་སེམས་ཅན་མང་པོ་ལ་ཕན་གསུང་། བརྒྱ་དང་དྲུག་པ་ནི། བླ་མ་ལྷ་རྗེ་རིན་པོ་ཆེ་ནི། རྒྱ་གར་དང་། ཁ་ཆེ་དང་གཉིས་ཀྱི་བར་ན། རྒྱ་གར་གྱི་ཡུལ་ཀན་པ་བྱ་བ་ན་གྲོང་ཁྱེར་པདྨ་ཅན་དུ་སྐུ་འཁྲུངས། ཞི་བའི་གོ་ཆ་བྱ་བར་མཚན་ཐོགས། རེས་དགེ་སློང་གི་ཆ་བྱད། རས་རྣལ་འབྱོར་པའི་ཆ་བྱད་དུ་མཛད་ནས་སྤྱོད་པ་དུ་མས་སེམས་ཅན་གྱི་དོན་མཛད་དོ། །བླ་མའི་ཞབས་དྲུང་ན་སློབ་མ་བཞི་བཅུ་ཙམ་སྐྱེས་ནས་འདུག་གསུང་། བརྒྱ་དང་བདུན་པ་
1-2-69b
ནི༑ བླ་མ་ལྷ་རྗེ་ལ་སྤྲུལ་པ་གསུམ་ཡོད་དེ། ནུབ་ཕྱོགས་བདེ་བ་བཀོད་པའི་ཞིང་ཁམས་ན། བྱང་ཆུབ་སེམས་དཔའ་དྲི་མེད་གྲགས་པར་མཚན་ཐོགས་པ་གཅིག་གིས་སེམས་ཅན་བྱེ་བ་ཙམ་གྱི་དོན་མཛད་གསུང་༑ གཅིག་ཤར་ཕྱོགས་ཀྱི་འཇིག་རྟེན་གྱི་ཁམས་ན་མུ་ཏིག་བྱེ་བས་བརྒྱན་པ་ན་བྱང་ཆུབ་སེམས་དཔའ་དྲི་མེད་ཟླ་བར་མཚན་ཐོགས། དེས་སེམས་ཅན་མང་པོའི་དོན་མཛད་གསུང་། བརྒྱ་དང་བརྒྱད་པ་ནི། གྲོང་ཁྱེར་པདྨ་ཅན་དུ་བླ་མ་ལྷ་རྗེ་སྐུ་དངོས་སུ་ཡལ་ནས། ཡང་སྟེང་གི་འཇིག་རྟེན་ཁམས་ན་ཨ་ཤོ་ཀ་ཨ་བྱ་ཞེས་མངོན་པར་རྫོགས་པར་སངས་རྒྱས་པ་ཡིན་གསུང་ངོ་། །འགྲོ་བའི་མགོན་པོ་དེ་ཉིད་ཀྱི་སྐུ་འབག་ལ་རྣམ་པར་ཐར་པ་བརྒྱ་རྩ་བརྒྱད་ཀྱིས་བསྐོར་བ། ཤན་ཤི་སྟོན་ཤའི་ཡི་དམ་དུ་བཞེངས་ནས་ཡོད་པ། སློབ་དཔོན་ཇོ་སྲས་ཀྱིས་གཟིགས་པས་མཉེས་ནས། འདི་དང་འཐུན་པའི་ལོ་རྒྱུས་ཡི་གེར་བགྱིས་ཅིག་གསུངས་ནས། འདི་ཉིད་ལ་འདྲིས་ཆེ་བའི་རྗེའུ་རིགས་ལ་རབ་ཏུ་བྱུང་བའི་སྤྱན་སྔ་བའི་བིཀྵ་ཀུ་མ་ར་བོ་དྷིས་གདན་ས་དེ་ཉིད་དུ་སྦྱར་བའོ། །དགེའོ།། །།


目录
རྣམ་ཐར་རེའུ་མིག་བརྒྱ་རྩ་བརྒྱད་པ་བཞུགས་སོ། །